Үтүө санаа кыайыыга кынаттыыр

Саха сириттэн анал байыаннай дьайыыга сылдьар хорсун санаалаах байыастарбытыгар көмө тиһигин быспакка ыытыллар. Эбээн-Бытантай улууһун дьоно-сэргэтэ эмиэ кыайыы туһугар бэйэлэрин кылааттарын киллэрэллэр. Ол курдук, улууспут тэрилтэлэриттэн биирдии күннээх хамнас хомуллан уонна авиабилиэт атыытыттан киирбит харчы мунньуллан, уопсайа 397 105,26 солк. байыастарбытыгар көмөҕө барда.

«Ыам ыйын бүтүүтэ анал байыаннай дьайыыга сылдьар байыастарбытыгар үп-харчы хомуйуутун биллэрбиппит. Улуус дьаһалтатын ыҥырыытын быһа гыммакка, үтүө санаанан, биир сүбэнэн сомоҕолоһон, байыастарбыт тустарыгар кыһаллан, улуустааҕы Оҕо саас киинэ 57 444,60 солк., оҕо спортивнай оскуолата 24 284, 28 солк, “Кэнчээри” оҕо уһуйаана 50 516,59 солк., “Хаарчаана” оҕо уһуйаана 119 859,79 солк. хомуйан төһүү күүс буоллулар. Онтон авиабилиэт атыытыттан киирбит харчы диэни быһааран биэрдэххэ, соторутааҕыта улууспутугар түргэнник ситэр салаа кыылларын, көтөрдөрүн тиэйэн кэлбит сөмөлүөт төттөрү төннүүтүгэр 15 тыһ. солк. сыаналаах авиабилиэт атыыламмыта. Онно биһиги улууспутуттан 10-ча пассажир көппүтэ, уопсайа 145 тыһ. солк. билиэт харчытыттан киирэн эмиэ көмөҕө барда», — диэн улуус баһылыгын солбуйааччыта Александра Иванова сырдатта.

Биһиги биир дойдулаахтарбыт сотору кэминэн кыайыы көтөллөөх эргиллиэхтэрэ, дьоннорун-сэргэлэрин көмөтө күүс-уох эбэн, санааларын бөҕөргөтөн, кыайыыга кынаттаан этэҥҥэ буолуохтара диэн эрэнэбит.

Сардаана Копырина

 

Читайте дальше