Кулун тутар 7 күнүгэр “Дюбун” ЭКК Үөһээ-Бытантай нэһилиэгин эбээлэрэ, ийэлэрэ, кыргыттара, үөрүү, дьол эйгэлээх, тулатыгар сырдыгы-ырааһы, үтүөнү, сылааһы эрэ тарҕатар аналлаах “Үс ситим – үс кэрэ” бэстибээлгэ, дьиҥнээх үөрүү-көтүү түһүлгэтигэр, муһуннулар.
Мустубут Кэрэ аҥардарга, олохтоох тэриллии аатыттан А.В. Старостин, оскуола кэлэктиибин аатыттан С.М. Иванов, эҕэрдэ истиҥ тылларын этэн туран, бырааһынньык бэлиэтин – тюльпаны туттаран үөртүлэр.
Бу эрэ күн харах халтарыйар кэрэтэ, сир симэҕинии сириэдийэр мичээрдэр, дьол кыымнаах харахтар, сып-сырдык, сылаас эйгэ, үөрүү туруга – биир сыанаҕа түмүллэн, эбээлэр, ийэлэр, кыргыттар сахалыы киэргэнэн-симэнэн, дьоҕурдарын арыйан, кэрэҕэ тардыһыыларын кэрэһэлээтилэр.
“Үс ситим – үс кэрэ” бэстибээл үс маастар-кылаастарга арахсан ыытылынна.
“Кэрэ көстүү” маастар-кылааска эбээлэр, ийэлэр, кыргыттар сахалыы халадаай кэтэн, киэргэли-симэҕи көрдөрдүлэр.
“Дьэ эрэ, астыахха!” маастар-кылааска сөбүлээн туттар бастыҥ рецептэрин билиһиннэрдилэр, рецебинэн астаммыт аһы көрдөрдүлэр, астарыттан амсатылар.
“Чөл олох – чөл турук” маастар-кылааска сахалыы үҥкүү хамсаныыларынан эти-сиини, ис туругу чэбдигирдиттилэр.
Маны таһынан, оҕолор ырыанан, үҥкүүнэн эҕэрдэлээтилэр, “Үс ситим – үс кэрэ” хаартысканан дьүһүйүү бырааҺынньык киэргэлинэн буолла. Саха суруйааччылара Ийэлэргэ анаан суруйбут хоһооннорун выставката, туһалаах сүбэлэр, кэрэ аҥардарбытыгар аналлаах фотозона мустубут дьон болҕомтотун тартылар.
Биһиги нэһилиэкпитигэр дьахтар симэхтэрин, атын араас оҥоһуктары оҕуруонан тиһэр уран тарбахтаах Люция Григорьевна Старостина уонна Татьяна Николаевна Петрова саха оһуорун дьикти эйгэтигэр угуйаллар, уһуйаллар. Кинилэр оҕуруонан тиһэн оҥорбут киэргэллэрин эбэлэрбит, ийэлэрбит, кыргыттарбыт көрдөрдүлэр.
5-7 кылаас үөрэнээччилэрэ Тимофей Сметанин “Күөрэгэй” остуоруйатынан, 8-9 кылаастар — Эрилик Эристиин “Хачыгыр”, 10-11 кылаас о5олоро – Суорун Омоллоон “Хараҥаҕа тыкпыт сырдык” айымньыларынан инсценировка туруоран, оруолларын итэҕэтиилээхтик арыйан, кэрэ эйгэ бырааһынньыгын киэргэттилэр, үтүөнү түстээтилэр.
Онтон мин бу “Үс ситим – үс кэрэ” бырайыагым сырдыгы-ырааһы, үтүөнү, сылааһы эрэ тарҕаттын. Мантан сиэттэрэн, дьикти ситиминэн салҕанар ийэ ууһунан үтүөҕэ-сырдыкка талаһыҥ, кэрэни кэрэхсии үөрэниҥ диэн санаабын этэбин.
Нина Софронова – Туйгууна,
Дьарҕаалаах бөһүөлэгэ.