Эбээн Бытантай улууһугар “Үлэлээх буолуу киин” араас хайысханнан дьону үлэлэтэр, баҕалаах дьону үөрэттэрэн, үлэ буларга көмө буолар сыаллаах- соруктаах үлэлиир.
Маны таһынан, сайыҥҥы өттүгэр оҕолору эрдэттэн үлэҕэ үөрэтэр, сыһыарар сыаллаах лааҕырдары үбүлээн ыытар, бу туһунан сиһилии Майя Охлопкова, Үлэлээх буолуу киин сүрүн исписэлииһэ кэпсиир.
«Сайыҥҥы бириэмэҕэ улахан оҕолору үлэҕэ үөрэтэр сыаллаах лааҕырдарга биһиги туһааннаах тэрилтэлэри кытта тэҥҥэ үлэлэһэбит. Ол курдук, сайын аайы “Волонтер” лааҕыры олохтоох дьаһалтаны кытта уопсай сүбэнэн ыытабыт. Хамнастарыгар олохтоох дьаһалта көрбүт харчытыгар эбии 5915 солкуобайы биэрэбит, онон бу оҕолор хамнастара 16915 солк. буолар.
Билигин волонтердар бэс ыйын 13 чыыһылатыттан үлэлии сылдьаллар, Саккырыыр нэһ. 10 оҕо, бу мантан 5 оҕоҕо хамнастарын аҥарын үлэлээх буолуу киин төлүүр. Кустуурга эбии оҕо ылбатахтар онон 5 оҕо үлэлиир, Дьарҕаалаахха от ыйыттан саҕалыахтаахтар, эмиэ 5 оҕолоох буолар.
Манна үлэтэ суохтар испииһэктэригэр сылдьар дьонтон “Уопсастыбаннай үлэлэр” бырагыраамманнан биирдии баһаатайы анаабыппыт, хамнастарын аҥарын биһиги төлүүбүт 9464 солк., аҥарын олохтоох дьаһалта.
Маны тэҥэ сайын аайы оҕолорбут төрүт үгэскэ уҺуйулла, сайын аайы таба ыстаадаларыгар көмө буола тахсаллар. “Кочевник” ородобуой община ыстаадаларыгар 8 оҕо, ИП Горохова Р.Н. ыстаадатыгар 3 оҕо, ол эбэтэр уопсайа 11 оҕо үлэлии тахсыбыттара. Манна 14-тэн 16 саастарыгар диэри 17541.36 солк., 16-тан 18 саастарыгар диэри 25581.15 солк. төлөнөр. Бу сылын аайы субсидия быһыытынан көрүллэр харчы. Сайаапка эрдэ, саас буолла да хомуйуллар, онон квота түргэнник туолар.”
Марианна СЛЕПЦОВА