Р.И. Шадрин аатынан Саккырыыр орто оскуолатын ахтыбыыстара Айыына Старостина, Элеонора Юмшанова Владивосток куоракка «Океан” оҕо киинигэр «Вектор успеха» Бүтүн Арассыыйатааҕы бэйэни салайыныы лидердарын форумнарыгар кыттыыны ыла бардылар.
Сиһилии Саккырыыр орто оскуолатын омук тылын учуутала, «Навигаторы детства» бырайыак муниципальнай куратора Елена Михайлова сырдатта.
— «Навигаторы детства” бырайыак чэрчитинэн бу сайын «Вектор успеха” диэн Бүтүн Арассыыйатааҕы куонкурус буолбута, онно биһиги өрөспүүбүлүкэбиттэн 4 оҕо кыайыылаахтарга киирэн, салгыы «Океан” лааҕырга Бүтүн Арассыыйатааҕы лидердар форумнарыгар кытта бардылар, олор истэригэр биһиги оскуолабыт «Осикат» бэйэни салайыныы ахтыбыыстара Айыына Старостина, Элеонора Юмшанова («Осикат” салайааччыта Елена Старостина бэлэмнээбит оҕолоро) киирдилэр.
Кыргыттарбытыгар сымнаҕас айаны уонна дойдубут таһымыгар тахсан үгүс билиини-көрүүнү сомсон, үтүө өйдөбүллээх кэлэллэригэр баҕарабыт.
Сардаана Копырина