Бу күннэргэ Мэҥэ Хаҥалас улууһун киинигэр «Сельская школа&Образовательная марка” «Школа в социокультурном измерении» үөрэҕирии эйгэтин үлэһиттэрин XX өрөспүүбүлүкэтээҕи дьаарбаҥка ыытыллар.
Манна, биһиги улуустан 17 педагог кыттыыны ылаллар. Үс күн устата педагогтар төгүрүк остуолларга, маастар – кылаастарга, семинардарга кыттаннар үөрэх эйгэтэ сайдыылаах, хаачыстыбалаах, үлэ иэйиилээх, таһаарыылаах буоларыгар билии – көрүү, баай уопут ылыныахтара.
Дэлэгээссийэ састаабыгар Р.И.Шадрин аатынан Саккырыыр орто оскуолатын дириэктэрэ Таисия Кейметинова киирдэ.
- Мин, Саккырыыр орто оскуолатыгар 2023-24 үөрэх дьылын төрдүс чиэппэриттэн дириэктэринэн ананан үлэлиибин. Оскуолабытыгар барыта 279 оҕо үөрэнэр. Сүрдээх көхтөөх, билии да, спорт, култуура да өттүнэн үрдүк ситиһиилээх оҕолор үөрэнэллэр. Сабыс саҥа, тупсаҕай оҥоһуулаах, киэҥ-куоҥ оскуолалаахпыт. Билиҥҥи кэмҥэ бэдэрээччик спортивнай, сынньалаҥ былаһааккалар, асфальт ситэриэхтээх, кырыыһа өрөмүөннэнэр. Бэдэрээччик 5 сыл устата эбийиэги көрөр – истэр дуогабардаах. Үөрэх чааһыгар киирдэххэ, “Земскэй учуутал” бырагырааманан биһиэхэ Алтайтан дьиэ кэргэн үлэлии кэлэн эрэллэр. Ол курдук, биология, химия уонна география предметтэрин учууталлара идэлээх дьон буолаллар. Маны таһынан, нуучча тылын уонна литературатын учуутала кэлиэҕэ. Онон, аһаҕас үлэ миэстэтэ суох, бары предметтэргэ толору учууталлар бааллар. Инники былааннар үгүстэр. Бу дьаарбаҥкаҕа биһиги, оскуолабыт баасатыгар «Көс оскуола – саад” арыйар былааммытын үллэстиэхпит, сүбэлэһиэхпит, үлэлиир анал үөрэхтээх, баҕалаах учуутал баар. Биһиги оҕолорбут, саас эрдэ таба иитиитин сыралаах үлэтигэр көмө буола тахсаллар. Табаһыт төрөппүттээх оскуола иннинээҕи саастаах оҕолор эмиэ туһааннаах үөрэхтээһини ылыахтаахтар. Кинилэри бу бырааптарын толору туһаналларын хааччыйар сыалтан Көс оскуоланы арыйар сөптөөх суол, дии саныыбын. Ааспыт үөрэх дьылыгар хаадыр тиийбэтинэн учууталлар хас да дуоһунаска тэҥинэн сылдьыылара үгүс, биллэн турар, бу үөрэх хаачыстыбатыгар, үлэ түмүгэр охсуулаах. Кэлэр үөрэх дьылыгар маны сааһылыахпыт, биһиги сүрүн сыалбыт – үөрэх хаачыстыбата. Холобур, 7 оҕо судаарыстыбаннай тургутуулары күһүн хат туттарыахтаахтар. Манна учуутал эрэ өттүттэн буолбакка, оҕо бэйэтэ уонна төрөппүт эмиэ кыһаллара наадалаах. Кэлиэхпиттэн кэтээн көрүүбүнэн, оҕолор консультацияҕа сылдьыылара мөлтөх. Инникитин, маннык быһыы тахсыа суоҕа диэн эрэнэбин. Балаҕан ыйын 1 күнүттэн биир сменанан үөрэниэхпит, бу эмиэ үөрэх хаачыстыбатын түмүгэр үтүө өрүттэниэҕэ, дии саныыбын. Биһиги учууталлар, үөрэх эйгэтин үлэһиттэрэ судаарыстыба сакааһын оҥоробут, ол сорукпутун чопчу толоруохтаахпыт. Кылаастарга оҕо ахсаана наһаа элбэҕэ суох, онон хас биирдии оҕоҕо учуутал биэрэр билиитэ тиийиэхтээх. Онтон оҕолорго туһаайан этиэм этэ, үөрэххитигэр кыһаллыҥ, оскуолабытын харыстааҥ. Эһиги кэннигититтэн оҕолоргут, сиэннэргит үөрэниэхтэрэ бу оскуолаҕа. Хаарыан сырдык, саҥа тэриллэрбитин харыстааҥ, ыраастык туттуҥ.
Үөрэниҥ, сайдыҥ, чэгиэн буолуҥ. Үөрэх баар – бараммат баай!