Саҥа үөрэх дьыла тигинээн кэллэ, сайын устата иһийэн турбут үөрэх тэрилтэлэрэ сотору кэминэн оҕо саҥатынан туолуохтара. Бу күннэргэ Кустуур орто оскуолата үөрэнээччилэрин сырдык, ыраас уонна сылаас дьиэҕэ көрсөөрү бэлэмнэнэн сууйуу-сотуу, кырааскалааһын үлэтин ыытар.
Сиһилии оскуола дириэктэрэ Матрена Горохова сырдатарыгар көрдөстүбүт.
Быйыл оскуоланы бүтэрбит 5 выпускник бары 100% үөрэххэ киирбиттэр
«И.Н. Слепцов аатынан Кустуур орто оскуолатыгар саҥа үөрэх дьылыгар маҥнайгы кылааска 11 үөрэнээччи киирэр. Быйылгы үөрэх дьылыгар оскуолаҕа 87 үөрэнээччи үөрэниэхтээх.
Оскуолаҕа билигин сууйуу-сотуу, кыралаан кырааскалааhын, саҥа миэбэл таҥыыта, сэргэхситии үлэтэ тэтимнээхтик бара турар.
Английскай тыл учууталын вакансията аhаҕас. Сайын устата учуутал көрдөөн элбэх үлэ ыытылынна, ол эрээри вакансия билигин да аһаҕас турар.
Маны кытта үөрэх дьыла саҕаланара аҕыйах бириэмэ хаалбытын кэннэ физик учууталбыт кэлбэт буолан хаалла. Онон физика учууталыгар эмиэ вакансия тахсан учуутал көрдөнөр утумнаах үлэ салҕанар.
Учебниктарынан хааччыллыыбыт үчүгэй. Сыл аайы үөрэх стандартарыгар уларыйыы киирэр, ону кытта учебник испииһэгэ эмиэ саҥардыллан сакаастаныллар, кэмигэр хааччыллыыны ситиhэ сатыыбыт.
Быйыл педагогическай кэлэктиипкэ саҥа үлэһиттэр, бэйэбит олохтоох исписэлиистэрбит үлэлии кэлэллэрин кэтэһэбит. Ол курдук, дириэктэри иитэр үлэҕэ солбуйааччынан Слепцова Надежда Семеновна, педагог-психологынан Каратаева Мария Васильевна уонна саҥа исписэлиис — история уонна обществознание учуутала Иванов Ариан Николаевич кэлэн эрэллэр.
Түгэнинэн туһанан, айымньылаахтык үлэлиир кэлэктииппин, үөрэнээччилэри уонна төрөппүттэри саҥа үөрэх дьыла саҕаланан эрэринэн эҕэрдэлиибин! Туруорбут сыалларбыт-соруктарбыт ситиһиилээхтик олоххо киирэллэригэр бары биир кэлим утумнаах үлэбит, үөрэхпит үтүө түмүктэри аҕаллын», — диэн Матрена Алексеевна баҕа санаатын тириэртэ.