Дьааҥы улууһун Элгэс нэһилиэгэр Аҕа дойдуну көмүскээччи сылынан уонна Элгэс нэһилиэгин анал байыаннай дьайыы бэтэрээннэрин бириистэригэр оскуола үөрэнээччилэрин икки ардыларыгар көҥүл тустууга аһаҕас турнир буолла. Бу күрэхтэһиигэ Эбээн-Бытантай улууһун бөҕөстөрө кыайан-хотон, үрдүк ситиһиилэнэн кэллилэр.
Ол курдук, 28 киилэ ыйааһыҥҥа Саккырыыр орто оскуолатын 4 кылааһын үөрэнээччитэ Еремей Рожин 1 миэстэни ылла. Тренерэ Петр Стручков бэлиэтииринэн, уолбут биир да баалы биэрбэтэ, барыларын туше уурталаата. Эмиэ 4 кылаас үөрэнээччитэ Аким Слепцов 35 киилэ ыйааһыҥҥа 3 миэстэ, 6 кылаас үөрэнээччитэ Алеша Устинов 34 киилэ ыйааһыҥҥа 2 миэстэ, 5 кылаас үөрэнээччитэ Павел Слепцов 38 киилэ ыйааһыҥҥа 2 миэстэ, 5 кылаас үөрэнээччитэ Александр Другин 44 киилэттэн үөһээ ыйааһыҥҥа 3 миэстэ, 7 кылаас үөрэнээччитэ Арылхан Другин 40 киилэ ыйааһыҥҥа 2 миэстэ, 2 кылаас үөрэнээччитэ Евдоким Дмитриев 24 киилэ ыйааһыҥҥа “Кыайыыга дьулуурун иһин” анал бириис хаһаайына буоллулар. 7 кылаас үөрэнээччитэ Вова Слепцов 45 киилэ ыйааһыҥҥа тустан, «Саамай элбэх бааллаах киирсии” диэн анал аат хаһаайына буолла. Петр Петрович “уолаттарым бары ыйааһыннарыгар кыра уҥуохтаахтар эбит, ол да буоллар, хотойдор, маладьыастар!” диэн хайҕыыр.
Бу үрдүк таһымнаах турнирга Элгэс нэһилиэгэр олорор биир дойдулаахпыт, анал байыаннай дьайыы уоттаах толоонугар олоҕун олук уурбут талба талааннаах, айар куттаах Василий Рожин ийэтэ Людмила Рожина биһиги оҕолорбутугар барыларыгар анал бириис туттарбыта ураты долгутуулаах түгэн буолла.
Түгэнинэн туһанан, Петр Петрович Людмила Васильевнаҕа, Элгэс оскуолатын үлэһиттэригэр, суоппардарга Василий Семеновичка, Илья Степановичка оҕолору таспыттарын таһынан үчүгэй спонсор буолбуттарыгар махтанар.
“Биһиги оҕолорбут, кыра бөҕөстөрбүт олус улахан таһымнаах аһаҕас турнирга баран, араас номинацияларга тиксэн, кыайыылаах-хотуулаах, ситиһиилээх кэллилэр! Бу үлэттэн-сыраттан тахсар, өссө төгүл оҕолорбутун, тренер Петр Петровиһы эҕэрдэлиибит! 
Бэйэбит эдьиийбит, балтыбыт, биир дойдулаахпыт Людмила Васильевна өйөөн-өйдөөн, оҕолорго тэбис-тэҥҥэ сүүрэн-көтөн көмөлөспүтэ олус хайҕаллаах. Бэйэтэ анал бириис анаан туттарда, оҕолор үөрүүлэрэ сүрдээх. Суоппар уолбут Илья Степановичка, Василий Семеновичка эмиэ барҕа махтал буоллун, уолаттарбытыгар харчынан бириис туттаран, оҕолор кэлэр өйүөлэрин ыллылар. Суоллара табыллан, олус сымнаҕастык айаннаатылар. Төрөппүттэрбит оҕо туһугар “ыалдьаллара” олус хайҕаллаах! Мир Николаевич массыына уларсан, Василий Семенович суоппардаан олус астынныбыт, үөрдүбүт. Төрөппүттэрбитигэр улахан барҕа махтал! Оҕолоргутун бүөбэйдээн, тэрийэн, эрэнэн өйдүүргүт олус хайҕаллаах, бары түмсүүлээхпит итинтэн көһүннэ, барыта оҕо туһугар! Улууспут баһылыгын солбуйааччытыгар Александра Викторовнаҕа, дириэктэрбитигэр Мария Юрьевнаҕа барҕа махтал! Массыына уларсан, уматыгын хааччыйан, ити баран үлэ бөҕө үлэлээн, ситиһии кынаттаах кэллилэр. Бары түмсэн, улууспут чиэһин көмүскээтилэр, ураа! Уолаттарбытын уһуйаан саҕаттан тэбис-тэҥҥэ дьарыктаан, иитэн таһаарбыт буолан олус ыалдьабын, ситиһиилэриттэн тэҥҥэ үөрэбин, онон, күүскэ сайыннылар, үүннүлэр, өссө элбэх кыайыыны-хотууну. Доом, Тускуо!» — диэн тренер Петр Петрович уҥа илиитэ, олоҕун аргыһа, спорт энтузиаһа Христина Стручкова үөрүүтүн үллэһиннэ.
Сардаана Копырина