Улууспут үөрэнээччилэрэ сылын ахсын түүннэри утуйбакка кэтэһэр тэрээһиннэрэ
ханныгый ?
Биллэн турар улуус баһылыгын харыйата ! Улуустааҕы оҕолорго аналлаах тэрээһиннэри ылан көрдөххө, туохтааҕар да кэтэһиилээх, туохтааҕар да үрдүк таһымнаах тэрээһин улуус Аҕа баһылыгын Харыйата буолар.
Тохсунньу 12 күнүгэр улууспут килбэйэр киинигэр Саккырыыр бөһүөлэгэр улуус баһылыгын Иннокентий Николаевич Стручков харыйата Кустуур, Дьарҕаалаах, Саккырыыр оскуолаларын уонна улуустааҕы Оҕо саас киинин, ону тэҥэ оҕо успуордун оскуолатын бастыҥ иитиллээччилэрэ уонна үөрэнээччилэрэ биир түһүлгэҕэ мустан сылааҕы түмүктэри таһаардылар, инники былааннары торумнаатылар. Күн бастакы аҥарыгар сытыы өй, булугас мэйии тургутуутугар квест – оонньууга көхтөөхтүк кытынныбыт.
Күүтүүлээх түгэнинэн, кыһыл көбүөр устун дьоһуннук туттан бырааһынньык саалатыгар киирии буолла. Салгыы бастыҥнары чиэстээтилэр уонна улуус баһылыга Иннокентий Николаевич хас биирдиибитигэр 5000 солкуобай стипендиялары үөрүүлээх быһыыга туттарда. Маны тэҥэ, остуоруйа дойдутуттан кэриэтэ көстүүлээх Тымныы оҕонньор минньигэс бэлэхтэри туттартабыта алыптаах эйгэни үөскэттэ, оҕо саас умунуллубат түгэннэрин санатта. Минньигэс астаах фуршетка олорон эҕэрдэ нүөмэрдэри көрөн, көрдөөх — нардаах оонньууларга умсугуйа оонньоон, тэтимнээхтик үҥкүлээн түмүктүүр чаас тиийэн кэлбитин билбэккэ да хааллыбыт. Шоу — чааһын эрчиминэн, тэтиминэн холобур буолар учууталбыт Мария Юрьевна Афанасьева иилээн – саҕалаан ыытта. Биһиги Кустууртан 9-11 кылаас оҕолоро 11 буолан ыҥырыллан сырыттыбыт, олус диэн дуоһуйдубут, астынныбыт.
Үгэскэ кубулуйбут сүрүн Харыйа тэрээһинэ хас биирдиибитигэр умнуллубат түгэни эрэ буолбакка, туохтааҕар да күндү саҥа билсиһиилэри уонна саҥа доҕоттору бэлэхтиир. Улууспут кэнчээри ыччаттарыгар ситиһиилэри баҕарабыт!
Наум Наумов, И.Н.Слепцов аатынан КОО «Бирокчан» пресс – киин.