Улуус кэскилэ Ыччат Баалыгар түмүстэ

Ыччат Баалын түмүктүүр тэрээҺинигэр үс нэҺилиэк эдэрдэрэ,  эрчимнээхтэрэ мустан оонньоон, күрэс былдьаҺан сэргэхсийдилэр.

Улуус баҺылыга Иннокентий Стручков «Эһиги улуус инникитэ, кэскилэ буоларгытын умнумаҥ! Үүнүҥ-сайдыҥ, үөрэниҥ, элбэҕи билэн – көрөн, улууспут чэчирии сайдарын ситиһэргэ дьулуһуҥ,» — диэн эҕэрдэтин тэҥэ, үтүө сүбэтин эттэ, ааспыт сыл түмүгүнэн үрдүк ситиҺиилээхтэри бэлиэтээтэ.

  • Баал маҥнайгы түһүмэҕэ тохсунньу 7 күнүгэр буолан ааспыта. Манна «Мы – патриоты» квест – оонньуу уонна улуус Аҕа баһылыгын Иннокентий Стручковы кытта көрсүһүү сэргэхтик ыытыллыбыта. Түмүктүүр тэрээһиҥҥэ үс нэһилиэктэн барыта 94 кыттааччы кэлбитэ.
  • Ыччат дьоммутун улуус баһылыга Иннокентий Стручков, Үөһээ Бытантай нэһилиэгин баһылыга Лев Горохов, үөрэх салалтатын салайааччыта Петр Потапов, «Хаарчаана» уһуйаан сэбиэдиссэйэ Марина Верховская, Оҕо саас киинин дириэктэрэ Анастасия Архипова, култуура салалтатын методиһа Полина Ефимова эҕэрдэлээтилэр.

Дьоро киэһэ аан чааһын Майя Кривошапкина уонна Николай Суханов иилээн – салайан ыыттылар. Иккис чааһы Дьарҕаалаах бэрэстэбиитэллэрэ Марианна Корнилова, Григорий Томскай, түмүктүүр чааһы Аллараа Бытантай ыччаттара Лиана Горохова уонна Наум Наумов саҥаран – иҥэрэн, эдэрдии эрчимнээхтик ыыттылар. Ыытааччылар оонньуу бөҕө ыытан, ыллатан – үҥкүүлэтэн бириэмэ биллибэккэ ааста. Эрдэ биллэриллибитин курдук, ыытыы түмүгүнэн «Бастыҥ ыытааччы» ааттаммыта, манна Майя Кривошапкина үчүгэйтэн үчүгэй буолла. Татьяна Старостина, Нюргун Боярскай, Щерзот Рябчиков, Егор Слепцов, «Осикат»  оҕо хамсааһына уонна Оҕо саас киинин иитиллээччилэрэ  ыллам ырыаларынан, үҥкүүлэринэн тэрээһини киэргэттилэр. Квест -оонньуу түмүгүнэн кыайыылаҕынан «Осикат»  оҕо хамсааһына буолан 10000 солк., 2 миэстэ – «Чемпионы»  үөрэх тэрилтэлэрин хамаандата, (5000солк.)  уонна 3 бочуоттаах миэстэни — «Нөлтэнкэ»  ыччаттар хамаандалара(3000 солк.) ситиһэннэр сертификаттары туттулар. Киирии билиэттэринэн лотерея ыытыллыбыта, манна супер – бирииһи (аэрогриль) Дайаана Никитина сүүйэн ылла. Дьарҕаалаахтан сылдьар Иван Колесов ититэр тэрил хаһаайына уонна наушник сүүйүүлээҕинэн Дарина Старостина буоланнар үөрүү өрөгөйүн биллилэр.

Остуол киэргэтиитэ күрэс эмиэ үгүс сэҥээриини ылла, 1 миэстэ – Дьарҕаалаах, 2 миэстэ – Кустуур, 3 миэстэ – “Хаарчаана” уһуйаан буоллулар. Түмүккэ, биир долгутуулаах түгэнинэн Баал Королеватын уонна Корольын талыы буолла. Манна биир санаанан, Ыччат Баалын Королеватынан Олеся Пшенникова уонна Корольынан Петр Слепцов, «Хаарчаана» уһуйаан үлэһиттэрэ ааттаннылар.

Сити курдук, Баалбыт киэҥ далааһыннаах, олус сэргэхтик буолан ааста. Улуус баһылыга Иннокентий Стручков бу тэрээһини үбүлээтэ, көҕүлээтэ. Онтон сүрүн спонсорынан урбаанньыт Валентина Андросова буолла, кинилэргэ улахан махталбытын этэбит, — диэн социальнай политикаҕа салаа салайааччыта Саргылана Петрова кэпсээтэ.