Улуу Кыайыы күнүгэр анаан

Эбээн Бытантай улууһун Бочуоттаах олохтооҕо Светлана Гаврильевна Горохова, бу күннэргэ Улуу Кыайыы 79-с сылын көрсө, сэрии сылларыгар бэйэлэрин харыстаммакка Кыайыы туһа диэн, тыылга үлэлээбит үлэ, тыыл бэтэрээннэрин, хаан-уруу дьоннорун туһунан «Кинилэр кыайыыга кылааттара»  дьиэ кэргэн түмэлигэр дьонун олохторун-үлэлэрин кэрэһэлиир быыстапканы туруорда.

Манна кини ийэтэ-Винокурова Христина Николаевна, Аҕата – Горохов Гаврил Дмитриевич, Булуҥ оройуонун Бороҕон нэһилиэгин олохтоохторо сэрии сылларыгар тугу үлэлээбиттэрин кэпсиир матырыйааллар, С.Г. Горохова (Харысхаана) суруйуулара:

  1. «Өйбөр ийэм өлбөөдүйбэт мөссүөнэ» 2022 с. Алтынньы ый 15 күнэ улуус «Бытантай уоттара» хаһыатыгар бэчээттэммит матырыйаал;
  2. «Аҕам туһунан ахтылҕаннаах суруйуум» бэчээккэ бара илик матырыйаал.

Ийэтин Винокурова Х.Н. уонна аҕатын Г.Д.Горохов тус докумуоннара көрдөрүүгэ тураллар.

Маны таһынан кини хотуна, кэргэнин Горохов И.И. ийэтэ Горохова Мария Никитична сэрии сылларыгар Верхоянскай оройуонун Аллараа Бытантай нэһилиэгин олохтооҕо, сэрии уонна үлэ бэтэрээнэ үбүлүөйүнэй бэрт элбэх мэтээллэрэ, грамоталара, махтал суруктара, кэнники 2000 сыллардаахха ылбыт Жуков мэтээлэ кытары көрдөрүүгэ бааллар.

Ону таһынан, бу кэпсэммит үлэ-тыыл бэтэрээннэрин мэтириэттэрэ, “культличность Сталина” дииллэрин саҕана, былаастартан чымадааннарын түгэҕэр кистээн уура сылдьыбыт ытыктыыр-сүгүрүйэр сирдьиттэрин Сталиннарын мэтириэтэ, Кыайыыга кынаттаабыт Сэбиэскэй Сойуус гимнын грампластинката, “Великая Отечественная война 1941-1945 гг.” – диэн историческай кинигэ, араас сылларга “Кыайыы күнүгэр” анаан, олохтоох “Бытантай уоттара” хаһыакка тахсыбыт тыыл уонна сэрии бэтэрээннэрин, олохтоох кырдьаҕастарын туһунан уонна улууска олорон ааспыт сэрии кыттыылаахтарын туһунан матырыйааллар хомуллан-наарданан дьон көрүүтүгэр  турдулар.

Бу быыстапканы бииргэ үлэлэһэр Саккырыырдааҕы орто оскуола 7 “Б» кылааһын оҕолорун учууталларын Е.А. Старостина көрдөһүүтүнэн туруордум диэн, түмэли бас билээччи-тэрийээччи кэпсээтэ уонна түгэнинэн туһанан, Улуу Кыайыы бырааһынньыгынан улууспут бэтэрээннэрин ис сүрэҕиттэн эҕэрдэлиир!