Уһуйаантан саҕалаан спорду көҕүлүүр Христина, Петр Стручковтар

Дьокуускай куоракка «От международных спортивных игр «Дети Азии» к университетскому спорту» VIII төгүлүн ыытыллар «Азия оҕолоро» спортивнай оонньуулар уонна Чурапчытааҕы физическэй култуура уонна спорт судаарыстыбаннай института тэриллибитэ 25 сыллаах үбүлүөйүн чэрчитинэн норуоттар икки ардыларынааҕы научнай конференция ыытылынна. Бу конференцияҕа биһиги биир дойдулаахтарбыт, спорду өрө туппут дьиэ кэргэн Христина уонна Петр Стручковтар кыттыыны ыллылар.

«Өрөспүүбүлүкэбит энтузиаст спортсменнарын, оҕо доруобуйатын чэбдигирдии туһугар үлэлиир педагогтары барыларын түмэр “Ой бото” диэн сүрдээх улахан бөлөх баар, бу бөлөҕү педагогическай наука кандидата Татьяна Алексеевна Макарова салайар. Биһиги дьиэ кэргэн кинини кытта билсэммит, бөлөх ыытар бырайыактарыгар кыттыһан, бииргэ үлэлээбиппит хаһыс да сылбыт буолла. «От международных спортивных игр «Дети Азии» к университетскому спорту» конференцияҕа 5 дойдуттан, 14 эрэгийиэнтэн уопсайа 200 кыттааччы ыҥырыылаах ыалдьыт буолбута, олор истэригэр биһиги дьиэ кэргэн ыҥырыыны тутаммыт олус үөрбүппүт.

Бу конференцияҕа өр сыллаах үлэбитин сырдаттыбыт, дьон сэҥээрэ иһиттэ, астынна, кыра уһуйаантан улахан үлэни үлэлээн энтузиаст дьоннор эбиккит диэн хайҕабылы ыллыбыт. Биһиэхэ кыра кыыспыт көмөлөһөн, биһиги туспутугар «ыалдьан”, оҥорбут үлэлэрбитин, видеороликтарбытын барытын сырдатан сүрдээх үчүгэйдик көрдөрбүтэ. Кыра бөҕөстөрү спортка көҕүлээн, көҥүл тустууга уһуйарбыт туһунан дакылаат аахпыппыт. Петр Петрович арктическай улуустартан күрэхтэһиигэ кытта барарга бырайыас ыараханы туһунан кыһалҕаны туруорсубута. Бу үлэбит сүнньүнэн сертификат туппуппут.

Конференция арыллыытыгар алгысчыт алҕаан, оһуохайдатан саҕалаабыта. Салгыы быыстапка буолбута, араас сиртэн кэлбит ыалдьыттарга үлэлэрбитин, бырайыактарбытын, сурунаалларбытын, араас матырыйаалларбытын көрдөрбүппүт. Ыраах сиртэн ыалдьыттар сүрдээҕин сэҥээрэн, кыра уһуйаантан улахан үлэни ыытар эбиккит диэн хайҕабылы ылбыппыт уонна сертификат туппуппут.

Николай Николаевич Чесноков диэн Москубаттан кэлэ сылдьар научнай конференция бэрэссэдээтэлэ, учуонай, профессор бэйэтинэн кэлэн кэпсэппитэ. Кини бастаан үлэтин уһуйааҥҥа методиһынан саҕалаабыт эбит. Онон, кэпсэтэр тиэмэбит киэҥ, кэллиэгэлэр курдук уопсай тыл булан, бу үлэбитин ыһыктыбакка, салгыы сайыннаран иһэрбитигэр баҕа санаатын биллэрбитэ.

Иккис күммүтүгэр Ил Түмэн судаарыстыбаннай мунньах дьиэтигэр барбыппыт. Онно эмиэ араас эрэгийиэннэртэн кэлбит ыалдьыттар, миниистирдэр, профессордар тыл этэн, кэскиллээх, олус интэриэһинэй мунньах буолбута. Бу манна биир дойдулаахпытын, Ил Түмэн судаарыстыбаннай мунньахха үлэлиир Наталья Попованы көрсөн, үөрэн-көтөн биһигини алҕаабыта. Маны тэҥэ биһиги биир дойдулаахпыт Илана Никитина эмиэ конференцияҕа кыттыыны ылан, үлэтин сырдаппыта, кэпсээбитэ.

Кэнчээри ыччат туһугар киэҥ кэскиллээх конференция сүнньүнэн научнай үлэлэр сборниктара тахсыбыта. Бу сборникка оскуола иннинээҕи саастаах оҕону көҥүл тустуу элеменнарын туһанан үөрэтэр ньымалар тустарынан ыстатыйам киирэн, үлэм уопута киэҥ эйгэҕэ тарҕаммытыттан үөрэбин,” – диэн Христина Иннокентьевна кэпсээтэ.

Сардаана Копырина

 

Читайте дальше