Волонтер күнүн чэрчитинэн Түгэһиир нэһилиэгэр «Муус күрэх-2024» буолла. Ахсынньы ый аам-даам тымныытын аахсыбакка, тэрилтэлэртэн эр дьон көхтөөхтүк кыттаннар, түөрт хамаанданы туруордулар.
Ол курдук, улуус дьаһалтатын иһинэн үлэлиир «Биир кэлим дьуһуурунай диспетчерскай сулууспа” (ЕДДС), ОДьКХ, баһаарынай чаас, уот ситимин тэрилтэлэрэ биэстии киһилээх хамаанда тэринэн, Үҥкүр күөлүгэр сарсыарда 10 чаастан саҕалаан икки чаас кэриҥэ муус ылыытыгар күрэс былдьастылар.
Тымныы оройугар эрчимнээх хамсаныыттан буһуулаах-хатыылаах күрэх түмүгүнэн «Биир кэлим дьуһуурунай диспетчерскай сулууспа” (ЕДДС) кыайыылаах аатын ылла! 2 миэстэни ОДьКХ, 3 миэстэни баһаарынай чаас хамаандалара ситистилэр, уот ситимин тэрилтэтэ көхтөөх кыттыытын иһин биһирэбили ылла. Бары хамаандаларга харчынан сэртипикээттэр туттарылыннылар, муҥутуур кыайыылаах хамаанда 15 тыһ.солк. ылла.
“Бу күрэхтэһиини улуус, нэһилиэк дьаһалталарын кытары ыччат бэлиитикэтигэр салаа тэҥҥэ тэрийэн ыыттыбыт. Түгэнинэн туһанан, бары кыттыбыт хамаандаларга махтанабыт, инникитин да улуус олоҕор мэлдьи көхтөөх буоларгытыгар баҕарабыт. Күрэхтэһии түмүгүнэн ылыллыбыт муус соҕотох олорор аҕам саастаах дьоммутугар итиэннэ анал байыаннай дьайыы кыттыылаахтарын дьиэ кэргэттэригэр, чугас дьонноругар тиэрдиллиэҕэ. Уопсайа 38 куб кэриҥэ муус таҕыста диэн суоттаабыппыт, 50-ча ыалга тиэйиллиэҕэ.
Манна бэлиэтээн этиэм этэ, күрэхтэһиигэ кыттыбатах, ол эрэн үтүө бачыымҥа кыттыһан, икки аҕам саастаах дьоҥҥо муус тиэйбит “Арктика суоллара» олохтоох салаатын уонна бэйэлэрин тэрилтэлэриттэн анал байыаннай дьайыыга барбыт дьоннорун дьиэ кэргэттэригэр 4 ыалга муус тиэйбит ОДьКХ тэрилтэтин. Итинник бэйэлэрин санааарынан ылсан, бар дьонноругар көмө буолаллара олус хайҕаллаах,» — диэн ыччат сэбиэтин салайааччыта Яков Горохов сырдатта.
Сардаана Копырина