Түгэһиир эбээннэрин ойуута-бичигэ аан дойду таһымыгар кэрэхсэнэр

Тарбаҕыгар талааннаах, иис ураты алыбар сүрэҕинэн-быарынан ылларбыт, өбүгэбит дьарыгын баһылыы туппут алын кылаас учуутала, икки оторой-моторой уол оҕо ийэтэ, тапталлаах кэргэн, сатабыллаах хаһаайка  Ольга Попова «Искусство души» Бүтүн Арассыыйатааҕы куонкуруска Гран-При үрдүк аатын ылла!

Ольга Олеговна ииһинэн үлүһүйбүтэ 9 сыл буолла. Оройуон таһымнаах күрэхтэртэн саҕалаан, үүнэн-сайдан, үлэлэрэ өссө тупсан «Якутия мастеровая», «Мир Арктики», «Сокровище Севера» курдук өрөспүүбүлүкэтээҕи, эрэгийиэннээҕи, норуоттар икки ардыларынааҕы улахан куонкурстарга, быыстапкаларга кыттан, үгүс элбэх грамота, диплом хаһаайына буолбута.

«Умсугутуулаах иис алыбар ылларан онто суох олох сатаммаппын. Дьиэ-уот үлэтэ, оҕо көрүүтэ, иистэнии барыта бииргэ барар, хайдах эрэ булан бириэмэбин аттарабын. Үксүтэ дьон сакааһынан тигэбин, хас үлэни тикпиппин билигин ааҕан сиппэппин. Кэлиҥҥи сылларга араас таһымнаах куонкурустарга кытынным, эһиил уус-уран оҥоһуктар маастардарыгар киирсэн көрөр баҕа санаалаахпын.  Түгэнинэн туһанан, миэхэ күүс-көмө, өйөбүл буолар бар дьоммор, чуолаан Степан Степанович Слепцовка, Розалия Николаевна Макароваҕа, Түгэһиир эбээннэрин тустарынан элбэх билиини биэрбит настаабынньыкпар Елена Романовна Колесоваҕа, аймахтарбар Ньургуйаана, Владислав Колесовтарга, ийэбэр, чугас дьоммор махталым муҥура суох. Кинилэр баар буоланнар араас таһымнаах быыстапкаларга, куонкурустарга кыттан, төрөөбүт дойдум, өбүгэм ойуутун-бичигин киэҥ эйгэҕэ таһараабын» — диэн Ольга Олеговна кэпсээтэ.

Умсулҕаннаах оҕуруо симиитэ, ойуу-дьарҕаа түһэрэр илии үлэтэ киэҥ эйгэҕэ сыанабылы ылан, айар аартыгыҥ алгыстаах буоллун,өссө инники диэки дабайан ис диэн биир дойдулаахпытыгар баҕа санаабыт бастыҥын тиэрдэбит.

Сардаана Копырина