Ил Дархан Айсен Николаев сылын аайы үөрэх, спорт бастыҥнарын, оскуола олоҕор бары өттүнэн көхтөөх кыттыылаах оҕолору муһан, үгэс быҺыытынан Сана Дьыллааҕы Харыйаны тэрийэр.
Быйылгы сылга Эбээн Бытантай улууһуттан бу кэрэ бырааһынньык кыттыылаахтарынан буоллулар — Саккырыыр орто оскуолатын 11 кылааһын үөрэнээччитэ Даша Старостина, Дьарҕаалаах орто оскуолатын 11 кылааһын үөрэнээччитэ Мартин Старостин, Кустуур орто оскуолатыттан 10 кылаас үөрэнээччитэ Вася Другин уонна 11 кылаас Таня Слепцова.
Маннык улахан тэрээһиҥҥэ оҕолорбутун Тамара Хамарова, Дьарҕаалаах орто оскуолатын учуутала арыаллаан илдьэ сырытта. Бу тэрээһин туһунан Тамара Владимировнаны ааҕааччыларбытыгар сиҺилии сырдата түһэригэр көрдөстүбүт.
— “Оҕолорбут Саха сирин араас муннуктарыттан кэлбит оҕолору кытта «Сосновый бор» санаторийга бииргэ сынньанан, билсэн, доҕордоһон, бу 3 күннэрин билбэккэ атаардылар, диэтэхпинэ сыыспатым буолуо.
Ахсынньы 23 күнүгэр, «Мы-будущее России!» гражданскай оҕо пуорумугар кытыннылар. Манна оройуоннарынан араартаан киллэрбиттэрэ: Усть-Яна, Хаҥалас, Чурапчы, Дьокуускай, Жатай оҕолорун кытта биир хамаандаҕа, медиа уонна коммуникация «Расскажи о главном!» бырайыагы көмүскээтилэр.
Барыбытыгар ордук кэтэһиилээх күммүт ахсынньы 24-һэ, бу күн 700 оҕо бары мустан Саха циркатыгар Айсен Николаев этиитин болҕойон олорон иһиттилэр, биһирээтилэр. Саҥа Дьыллааҕы Саха цирка артыыстара, спортсменнара бэлэмнээбит нүөмэрдэрин көрөн астыннылар.”
Ити курдук уопсай сырыыларын салайааччылара сырдатта.
Аны бу тэрээһин ыҥырыылаах ыалдьыттарын кытта санааларын үллэстэллэригэр көрдөстүбүт.
Мартин Старостин, ДьОО 11 кылааһын үөрэнээччитэ:
— “Ил Дархан Харыйатыгар биһиги 4 буолан барбыппыт, кыратык кэпсээн ыллахха, олус үчүгэй тэрээһин ааста. «Сосновый бор» га элбэх улуус оҕолорун кытта билистим, манна араас оонньуулары ыытаннар барыбытын биир сомоҕо оҥорон, уопсай тыл булан билсиһэрбитигэр көмө судургу буолбута.
ХXI пуорум «Мы будущее Росии» ыытыллыбыта, онно эмиэ үгүс ахтыбыыстар кыттыыны ылтара. Сүрүн тэрээҺин Саха циркатыгар буолан ааспыта, маастар- кылаастары көрдөрбүттэрэ. Уонна сэрэхтээх трюктары, интэриэһинэй үҥкүүлэри көрдөрбүттэрэ. Мин санаабар хаһан да умнуллубат, саамай үчүгэй бырааһынньык ааста.”
Даша Старостина, СОО 11 кылааһын үөрэнээччитэ:
— “Биһиги «Сосновый бор» сыппыппыт үс күн, манна элбэх билсиһии, көрсүһүү буолбута. Үчүгэй бэйэлээх оҕолору кытта билистим, күн аайы араас тэрээһиннэр буолаллар этэ,барыта сүрдээх интэриэһинэй. Ил Дархан Харыйатын бырааҺынньыга эмиэ үчүгэйдик ааста, арааһынай нүөмэрдэри көрдөрбүттэрэ, Айсен Николаевы кытта хаартыскаҕа түспүппүт, ол кэнниттэн дискотека уонна оонньуулар буолбуттара.”
Татьяна Слепцова, КОО 11 кылааһын үөрэнээччитэ:
— “Биһиги «Сосновый борга» сыппыппыт, 1 академия этим, ҮөҺээ, Орто Халымалары, Өлөөн оҕолорун кытта биир академияга түбэспитим. Бастаан тиийбиппитигэр билсиһии буолбута, наҺаа элбэх оҕону кытта билистим, ону тэҥэ Кремлевскай Харыйаҕа тэҥҥэ сылдьыбыт оҕолорбун көрүстүм, элбэх билэр оҕолорум бааллар этэ.
Иккис күммүтүгэр бэлэмнэниигэ сылдьыбыппыт, онтон Оҕо саас ДыбарыаҺыгар «Мы будущее России» пуорумҥа кыттыбыппыт. 6 улуус оҕото биир бырайыак оҥорон көмүскээбиппит.
Ахсынньы 24 күнүгэр саамай интэриэһинэйэ саҕаламмыта, ол эбэтэр Саха сирин Ил Дарханын Харыйата буолбута. Манна күнүс 12:30 Саха циркаҕа барбыппыт, элбэх маастар-кылаастар, фотосессиялар бааллара. Онтон саалаҕа киирбиппитигэр, остуоруйа курдук спектакль көрдөрбүттэрэ, наһаа астык этэ, саҥа көрүү-үөрүү, саҥа санаалар киирбиттэрэ. Ол кэннэ уопсай хаартыска түһүү буолбута, онтон дискотека саҕаламмыта, манна биллиилээх диджей кэлэн муусука тыаһаппыта.
Айсен Николаев барыбытыгар 25 тыһ. сууммалаах «Алмазэргиэнбанк» карточкатын бэлэх ууммута.
Урут эмиэ маннык тэрээһиҥҥэ сылдьыбыт буоламмын, уопуттаахпын диэххэ сөп.
«Сосновый бор» ыыппыт тэрээһиннэрэ интэриэһинэй, бэһиэлэй этилэр, баһаатайдар эмиэ олус үчүгэйдэр. 2023 Ил Дархан Харыйата наһаа үчүгэйдик ааста, маннык тэрээһиҥҥэ сылдьарбыттан олус астынабын, үөрэбин, элбэх саҥа доҕор-атас, билсиһии буоларыттан үөрэбин.
Оҕолор үөрэххитигэр кыһаллыҥ, барытыгар көхтөөх кыттыылаах буолуҥ, оччоҕо бу курдук улахан тэрээһиннэргэ сылдьан элбэх саҥаны билиэххит, билсиҺиэххит.»
Ыраах хоту улуустан, оҕолорбут маннык улахан тэрээһиннэргэ ыҥырыллан кыттыыны ылалларыгар үөрүөххэ, киэн туттуохха эрэ наада. Элбэх сытыы-хотуу, талааннаах кэнчээри ыччаттарбыт сайда-үүнэ турдуннар. Кэнчээрибит сайдыыта- улууспут уйгута! Марианна СЛЕПЦОВА