Дьокуускай куоракка СӨ аҕыйах ахсааннаах төрүт омуктарын Ассоциацията тэриллибитэ 35 сылынан этническай холбоһуктар икки ардыларыгар “Строганина-Тала-2024” бэстибээл-куонкурус ыытылынна. Бу күрэххэ биһиги улууспутуттан Владислав Колесов уонна Николай Иванов кыттаннар, 1 миэстэни ыллылар!
«Строганина-Тала – 2024” күрэххэ уопсайа 6 этническай холбоһук кыттыыны ылла. Биһиги, Эбээн-Бытантай улууһун эбээннэрин Ассоциациятын аатыттан Николай Ивановтуун киирдибит. Күрэх усулуобуйата диэн хамаандаҕа икки киһи буолуохтаах, биир киһи тоҥ балыгы кыһар (чыыр), иккис киһи кыһыллыбыт балыгынан «пирамида” оҥорор. Ким саамай үрдүк «пирамиданы” тутар, ол кыайар, бу манна төһө түргэнник бүтэрбит эмиэ сыаналанар.
Ол курдук, биһиги бастакынан бүппүппүт уонна саамай үрдүк пирамида биһиэнэ этэ — 25 см. Иккис миэстэлээх 23 см., үһүс миэстэлээх 19 см. Оннук гынан эбээн бытантайдар бастаатыбыт. Бириистэрэ олус үчүгэй! Иккиэммитигэр бытовой тиэхиньикэ уонна саха быһахтарын бэлэх туттардылар», — диэн үөрэн-көтөн Владислав Васильевич кэпсээтэ.
Сардаана Копырина