Ааспыт нэдиэлэ устата өрөспүүбүлүкэҕэ сытыы бөрүөлээхтэр, айар куттаахтар мустан үгүс араас тэрээһиннэргэ кыттыыны ыллылар.
Биһиги быйыл кэккэ биричиинэннэн манна кэтэхтэн кытынныбыт. Эрэдээксийэ үүммүт сылга тэриллибитэ 35 сылын бэлиэтиир. Устуоруйа кэрчигин сэгэттэххэ, бастакы эрэдээктэринэн Михаил Харитонович Спиридонов үлэлээбит. Ол кэннэ, араас сылларга Е.Е.Сибиряков, Е.Г.Колесов – Бытантай, С.Л. Никитина, Н.Р. Попова эрэдээктэрдээбиттэр. 35 сыл устата үгүс элбэх уларыйыылар түмүктэригэр билигин «Бытантай уоттара» Эрэдээксийэ диэн ааттанан үлэлиибит – хамсыыбыт. Кэлэктииппитигэр 5 буолан, судаарыстыба сакааһынан хаһыат, ону таһынан араас цифровой былаһааккаларга тиһигэ быстыбат сонуннары таһаарабыт. Ханна да буоларын курдук, түһүү – тахсыы, кыаллыбат да ханна барыай. Ол эрэн, сыралаах үлэнэн сырдыкка, сайдыыга дьулуһан, үтүө түмүктэри ситиһэргэ кыһаллабыт.
Ол курдук, ааспыт сыл түмүгүнэн үөрүүбүтүн эһигини, эрэллээх ааҕаччыларбытын кытта үллэстэбит.
- «Полиграфист года» СӨ инновация министиэристибэтин куонкурсугар Нюргун Боярскай Лауреат үрдүк ааты ситистэ. Маны тэҥэ, Нюргун Гаврильевич миниистир Василий Ефимов уонна улуус баһылыга Иннокентий Стручков Бочуот кырааматаларынан наҕараадаланна. СӨ Ис сибээс уонна норуоттар дьылаларыгар министиэристибэ куонкурсугар Нюргун Боярскай «За лучшее освещение” II ист. Диплом, Яна Рожина “Печатные и электронные издания на муниципальном уровне” II ист.Диплом хаһаайыттара буоллулар. Билигин баһаарынай чааска үлэлии сылдьар Марианна Слепцовабыт СӨ Үлэ уонна социальнай сайдыы тэрийэн ыыппыт «Семья – отражение жизни” куонкурсугар «Лучший репортаж” номинация Кыайыылааҕа буолла. Онтон уопсастыбаннай кэррэспэндьиэн Светлана Горохова – Харысхаана «Сахабэчээт» САТ сылын аайы ыытар куонкурсугар “Общественный корреспондент” номинация II истэпэннээх Дипломы ылла. Биир сүрүн наҕарааданан улус медиа куонкурсугар сетевой сыһыарыыбыт «За содержательность» номинацияы Кыайыылааҕынан ааттаммыппыт буолар.
Ханнык баҕар үлэ сыаналара, болҕомтоҕо ылыллара үтүө түмүккэ сүрүн төһүү. Биһиги үлэбитигэр билиҥҥи кэмҥэ сүрүн харгыстарынан хаһыат бэчээттиир ризографпыт «тыын быһаҕаһынан” үлэлии турара буолар. Бу ризограф 2013 сыллаахха Саха Өрөспүүбүлүкэтин Гранын үбүлээһининэн ылыллыбыта, ол эбэтэр 10 -тан тахса сыл үлэлээтэ. Дойдубутугар биллэр биричиинэнэн санкциялар биллэриллэннэр маннык ризограф атыыламмат, Арассыыйаҕа оҥоһуллубат. Бу балаһыанньаттан тахсарбытыгар ризограф (дупликатор) “Duplo DP-X850» диэн тэрилгэ улахан баҕа санаалаахпыт. Бу принтер үчүгэйэ диэн, хаһыат эрэ буолбатах, араас полиграфическай бороодууксуйаны барытын бэчээттиир кыахтаах. Бу туһунан улууспут баһылыгар, улуус Сэбиэтин дьокутааттарыгар көрдөһүү суруктары ааспыт сылга тиэрдэн турабыт. Кинилэр өйөбүллэригэр бигэтик эрэнэбит.
Бука бары биир дойдулаахтарбытын, эрэллээх ааҕааччыларбытын үүммүт Саҥа сылынан итиитик – истиҥник эҕэрдэлиибит! Санаабыккытын ситэн, толкуйдаабыккытын тобулан чэгиэн буолуҥ! Иллээх — эйэлээх халлааны!
Яна Рожина, кыл.эрэдээктэр