Быйылгы үөрэх сылыгар А.С. Садовников аатынан Дьарҕаалаах орто оскуолатыгар 4 кылааһы 1 оҕо, 9 кылааһы 7 оҕо, 11 кылааһы 2 оҕо бүтэрэр.
Хас биирдии үөрэх дьыла биһиги оҕолорбутугар, учууталларбытыгар саҥа үктэллэри, сырдык аартыктары, үрдүк сыаллары туруорар. «Тиһэх чуораан” бырааһынньыга ону барытын түмэр, түмүктүүр, үчүгэй үөрэнээччилэрбитин, спортка, наукаҕа, искусствоҕа ситиһиилээхтэри чиэстиир үөрүүлээх, өрөгөйдөөх күн.
Үөрүүлээх күммүтүгэр биһиэхэ ыҥырыылаах ыалдьыттарынан кэллилэр: «Үөһээ-Бытантай нэһилиэгэ» муниципальнай тэриллии дьаһалтатын баһылыга Л.В.Горохов, биһиги ытыктыыр, убаастыыр бэтэрээн учууталларбыт, төрөппүттэрбит.
Мустубут дьон быйылгы үөрэх дьылын выпускниктарын уонна кинилэр учууталларын киириилэрин дохсун ытыс тыаһынан долгуйа көрүстүлэр.
2023-2024 үөрэх дьылын түмүктүүр линейкабыт Россия Федерациятын, Саха Өрөспүүбүлүкэтин, Эбээн-Бытантай улууһун, Үөһээ-Бытантай нэһилиэгин былаахтарын көтөҕөн, өрөгөй ырыанан саҕаланна.
Төрөөбүт Сахаҕыт сирин сайыннара туруҥ, дойдугутугар туһалаах дьон буолуҥ диэн алҕаан туран нэһилиэк баһылыга Л.В. Горохов оскуоланы бүтэрэр оҕолорбутугар сэмэй өйдөбүнньүк бэлэхтэрин туттарда.
Оскуола дириэктэрэ Иванов С.М. туйгун үөрэнээччилэрбитин, спортка, наукаҕа, искусствоҕа ситиһиилээх оҕолорбутун чиэстээтэ.
Оҕолор бастакы учууталлара, кылаас салайааччылара олус долгуйан туран эҕэрдэлээтилэр, үөрүүлэрин тэҥҥэ үллэһиннилэр. Билии тургутугун этэҥҥэ ааһан, сөбүлүүр үөрэххитигэр туттарсын диэн алҕаатылар уонна түөстэригэр өйдөбүнньүк мэтээл кэтэртилэр, өйдөбүнньүк фотоальбом туттардылар.
Оҕолорбут тустара диэн куруук кыһанар, үчүгэйи эрэ түстүүр — биһиги төрөппүттэрбит. Кинилэр өйөбүллэрэ, истиҥ сыһыаннара үрдүккэ көҕүлүүр, сырдыкка- кэрэҕэ ыҥырар. Төрөппүттэр ааттарыттан П.Р. Самойлова, бэтэрээниучуутал М.Г. Горохова эҕэрдэлээтилэр.
Выпускниктар ааттарыттан харда тылы киэн туттар үөрэнээччилэрбит Ангелина Слепцова, Мартин Старостин (11 кылаас), Андриан Петров (9 кылаас) эттилэр.
“Тиһэх чуораан” — саамай долгутуулаах түгэн. Үрдүктэн — үрдүккэ кынаттыыр чуорааны тыаһатар чиэс 1 кылаас үөрэнээччитигэр Настя Старостинаҕа уонна 11 кылаас үөрэнээччитигэр Мартин Старостиҥҥа бэрилиннэ.
Үөрүүлээх күммүт бүтүүтэ, оскуола историятын биир сүдү кэрчигин кэрэһэлиир түгэнинэн, выпускниктарбытын кытта хаартыскаҕа түһүүнэн түмүктэннэ.
Нина Софронова, Дьарҕаалаах нэһ.