Р.И. Шадрин аатынан Саккырыыр орто оскуолатыгар төрөөбүт төрүт тылы үөрэтиигэ, сөргүтүүгэ үлэ тиһиктээхтик ыытыллар. Бу күннэргэ «Аймулдан бадикар» Түгэһиир эбээннэрин тылларынан этнодьыктаан буолла.
Төрүт тылы харыстыырга туһуламмыт тэрээһини оскуола тэрийээччитэ Хаарчаана Горохова, үөрэх кыһатын дириэктэрэ, эбээн тылын уонна култууратын илдьэ сылдьар Таисия Кейметинова сүрүннээтилэр.
Дьыктааҥҥа уопсайа 17 киһи, ол иһигэр 5 улахан киһи уонна оскуола үрдүкү кылаас үөрэнээччилэрэ кытыннылар.
«Саккырыыр орто оскуолатыгар эбээн тыла 1-тан 11 кылааска диэри үөрэтиллэр. Төрөөбүт тылы үөрэтиигэ нэдиэлэҕэ 2 чаас көрүллэр, литэрэтиирэҕэ 1-тан 6 кылаас үөрэнээччилэригэр 2-лии чаас, 7-11 кылаастарга – 1 чаас.
«Аймулдан бадикар» Түгэһиир эбээннэрин тылларынан этнодьыктаан үрдүк таһымнаахтык ыытылынна. Дьыктааҥҥа 17 киһиттэн 9 киһи сыыһата суох, атыттар ортонон суруйдулар. Сүрүн сыыһаларга ордук хос буукубалары суруйуу уонна «н” уонна “ҥ” буукубалары буккуйуу, пунктуация өттүгэр соппутуой бэлиэни көтүтүү бэлиэтэннэ,” – диэн Таисия Васильевна кэпсээтэ.
Надежда Родионова, эбээн тылын учуутала:
— Эбээннии этнодьыктаан тиэкиһэ интэриэһинэй, тиэмэтэ билиҥҥи олоххо сөп түбэһэр, ыарахан тыллара суох.
Сотору кэминэн, ыам ыйын 9 күнүгэр Аҕа дойду сэриитигэр Улуу Кыайыы 80 сылын бэлиэтиэхпит, бу устуоруйа чэрчик, бэлиэ түгэнэ оскуолабыт эрэ буолбакка, улуус, өрөспүүбүлүкэ уонна дойдубут үрдүнэн ыытыллар тэрээһиннэригэр барытыгар сүҥкэн суолталаах. Украинаҕа анал байыаннай дьайыы ыытылла турарынан өссө дириҥ суолталанна. Урукку сыллар, кэмнэр-дьыллар курдук аҕаларбыт, уолаттарбыт дойдубут көмүскэлигэр турдулар. Биһиги дьыалабыт кырдьыктаах диэн итэҕэйэбит. Кыайыы биһиэнэ буолуоҕа!
Нина Степанова, 10 “а” кылаас үөрэнээччитэ:
- Төрөөбүт тылбытынан дьыктааҥҥа биир саастыылаах доҕотторбунаан, дьүөгэлэрбинээн үөрэ-көтө кыттыыны ыллыбыт. Дьыктааны биһиги саастыылаах атын улуус, эрэгийиэн оҕолоро эмиэ бэйэлэрин төрөөбүт тылларынан суруйаллара үөрүүлээх, тэрээһин киэҥ далааһыннааҕа астыннарар. «Россия — дом народов» диэн күөх экрааҥҥа ойулук турбута биһиги киэҥ, модун дойдубут норуоттара биир сомоҕолоохпутунан уонна түмсүүлээхпитинэн киэн туттуу санаатын үөскэтэр.