Эбээн-Бытантай улууһугар тугут ахсаана түмүктэннэ. Тугуту ааҕыыга улуус баһылыга Иннокентий Стручков, тыа хаһаайыстыбатын салайааччыта Лена Бочкарева, «Ленинскэй” муниципальнай унитарнай тэрилтэ дириэктэрэ Мичил Слепцов уо.д.а. исписэлиистэр ыстаадаларга тахсаннар, табаһыттар олохторун-дьаһахтарын кытта билистилэр.
«От ыйын 20 күнүгэр улуус баһылыга Иннокентий Стручков, «Ленинскэй” МУТ дириэктэрэ Мичил Слепцов, бу тэрилтэ биригэдьиирэ Павел Слепцов, бэтэринээринэй салалтаттан Мария Карманова буолан, тугут ахсааныгар ыстаадаларынан сырыттыбыт.
Бастаан Тумараҕа Владимир Чукров звеневодтаах 1 нүөмэрдээх ыстаадаҕа, салгыы Мас Салаа үрэҕэр Павел Константинов салайар 2 нүөмэрдээх ыстаадатыгар, онтон Тара Салаа үрэҕэр Тихон Колесов звеневодтаах 3 нүөмэрдээх ыстаадаҕа тугуту аахтыбыт.
Ол түмүгүнэн “Ленинскэй” МУТ тугута 400-тэн эрэ тахса буолла, хомойуох иһин, кыра көрдөрүү. Табаһыттар төһө да түүннэри-күнүстэри табаларын көрдөллөр, манааталлар да адьырҕа кыыл элбэҕэ, үлэлиир илии тиийбэтэ атахтыыр. Таба иитиитигэр саамай тугут төрүөҕүн үчүгэйдик ылыы эрэ буолбакка, табаны биир кэм көрүү ирдэнэр.
Таба ахсаана «Ленинскэй” МУТ сылын аайы аччыы турар, ол түмүгэр үбэ-харчыта тиийбэт. Улуустан сылын аайы хастыы эмит мөлүйүөн солк. төттөрү бара турар.
Ол да буоллар, табаһыттар үлэлээбиттэрин курдук үлэлии-хамныы сылдьаллар, санааларын түһэрбэттэр. Биһиги бу бара сылдьан төрүт салааны тута сылдьар дьоммут сайыҥҥы өттүгэр үлэлэрин, олохторун-дьаһахтарын илэ харахпытынан көрөн, истэн кэллибит. Дьиэ кэргэттэр оҕолорун ыстаадаҕа таһааран үлэлии, көмөлөһө сылдьаллара көрүөххэ үчүгэй.
Бу саас таба төрүөҕэр “Кыһыл наарта» тэриллэн, тэрилтэлэртэн дьону таһааран күүс-көмө буолбуттара. Ол курдук, Саккырыыр орто оскуолатыттан, оҕо спортивнай оскуолатыттан, оҕо саас кииниттэн, улуус дьаһалтатыттан тахсан табаһыттарга көмөлөһөн, сайыҥҥы мастарын мастаан, табалаан үтүө бачыымҥа кыттыспыт тэрилтэлэрбитигэр барҕа махтал буолуохтун.
Биһиги улууспут тыа хаһаайыстыбатынан силистэнэн-мутуктанан, үүнэн-сайдан олорор. Төрүт салааны сайыннарыыга, өрө тардыыга күүс-көмө буолуоххайыҥ диэн ыҥырабын,» — диэн тыа хаһаайыстыбатын салайааччыта Лена Бочкарева тугут ахсаанын түмүгүн, уопсастыбаннай табаны иитии билиҥҥи туругун сырдатта.
Сардаана Копырина