Хотугу дойдубут ыччаттара алмаас таас курдуктар. Кинилэри чочуйан, кырыылаан биэрдэххэ, кустук сэттэ өҥүнэн сандаараллар. Спорт түһүлгэтигэр оҕолорбут ааттара сотору-сотору дорҕоонноохтук ааттанан, ситиһии ситиһиигэ кынаттыыр.
Бу күннэргэ Дьокуускай куоракка 25 нүөмэрдээх оскуолаҕа 6 кылааска үөрэнэр уолбут Эрсан Сыроватский Амма улууһугар СССР спордун маастара М.Н. Дьячковскай, норуоттар икки ардыларынааҕы спорт маастара Н.Я. Старостин, РФ спордун маастара Э.Я. Старостин бирииһигэр 2012-2017 сыллааҕы төрүөх уолаттарга көҥүл тустууга өрөспүүбүлүкэтээҕи турнирга 41 киилэ ыйааһыҥҥа 2 дьоһуннаах миэстэни ылла!
Эрсан олох кыратыттан спорду өрө тутан, утумнаахтык дьарыктанан, араас күрэхтэһиилэргэ тимир курдук уһаарыллан, киэҥ түһүлгэҕэ, улахан көбүөргэ бэйэ кыаҕын холонон, инники күөҥҥэ сылдьар. Маныаха кыратыттан дьарыктаабыт тренерэ Петр Стручков өҥөтө баар эбээт! Кини спортивнай тэрээһиннэргэ суолта биэрэн, оҕолорбутугар бастакы тирэх буолар.
Сардаана Копырина