Эбээн-Бытантай улууһугар «Ийэм, аҕам уонна мин – спортивнай дьиэ кэргэн» өрөспүүбүлүкэтээҕи күрэх муниципальнай түһүмэҕэ буолла. Улуустааҕы күрэххэ кытыы нэһилиэктэртэн Кустууртан, Дьарҕаалаахтан спорду өрө тутар дьиэ кэргэттэр айаннаан кэлэннэр, уопсайа түөрт ыал күөн көрүстэ.
Ол курдук, Дьарҕаалаахтан Татьяна, Александр Ивановтар кыыстара Каролиналыын, Кустууртан Анжела, Ньургустан Слепцовтар кыыстара Алгыстааналыын, Вера, Илья Аммосовтар кыыстара Танялыын, Саккырыыртан Августина, Семен Старостиннар уоллара Саянныын кыттыыны ыллылар.
Күрэхтэһии 8 түһүмэхтэн турда: “визитная карточка”, “прыжок в длину с места”, “сгибание и разгибание рук в упоре лежа на полу”, “поднимание туловища и опускание туловища, лежа на спине”, “конкурс меткость”, “прыжки через скакалку”, “конкурс эрудит”, “конкурс “эстафета с обручами”.
Спортивнай түһүмэхтэр бары олус тыҥааһыннаахтык аастылар. Кыттааччылар бары кыайыы иһин дьулуурдарынан кимиилээхтик кииристилэр. Манна дьиэ кэргэттэр төһө түмсүүлээхтэрэ, бэйэ-бэйэни өйдөһүүлэрэ, өйөһүүлэрэ кыайыыга ордук күүстээх тирэх буолла диэтэххэ сыыспатым буолуо. Кыракый кыттааччылар, уһуйаан саастаах оҕолор дьонноруттан харыс да хаалсыбакка, араас түһүмэхтэргэ харса суох бэйэлэрин холонон, көхтөөх кыттыыны ылбыттара көрөөччү биһирэбилин ылла. Оҕолор олус маладьыастар!
Дьүүллүүр сүбэҕэ оҕо спортивнай оскуолатын тренердэрэ — волейболга дьарыктыыр Иван Тоскин, хотугу многоборьеҕа Борис Кириллин, хапсаҕайга Семен Стручков уонна үөрэх салалтатын исписэлииһэ Мария Чупрова олордулар.
Киимиилээх киирсиилэр, тыҥааһыннаах түһүмэхтэр түмүктэринэн кыайыылаахтары улуус баһылыга Иннокентий Стручков биллэрдэ. Ол курдук, күрэхтэһии муниципальнай түһүмэҕин кыайыылаахтарынан эдэр ыаллар Августина, Семен, уоллара Саян Старостиннар дьиэ кэргэттэрэ буоллулар уонна бу дьыл ахсынньы 14 күнүгэр буолар өрөспүүбүлүкэтээҕи күрэхтэһиигэ кытта барар чиэскэ тигистилэр. Манна бэлиэтээн эттэххэ, улуус чиэһин көмүскүү барар дьиэ кэргэн бырайыастарын улуус дьаһалтата уйунар. Иккис миэстэни Вера, Илья, кыыстара Таня Аммосовтар, үһүс миэстэни Татьяна, Александр, кыыстара Каролина Ивановтар дьиэ кэргэттэрин хамаандалара ыланнар, грамотанан уонна бэлэх сертификатынан наҕараадаланнылар. Кустууртан кэлбит Анжела, Ньургустан, кыыстара Алгыстаана дьиэ кэргэттэрэ «Көхтөөх дьиэ кэргэн» анал аат хаһаайына буоллулар уонна эмиэ сертификаты бэлэх туттулар.
“Хаарчаана” оҕо уһуйаанын сэбиэдиссэйэ Марина Верховская уһуйаан аатыттан сэмэй бэлэхтэрин кытары махтал суруктарын Августина, Семен Старостиннар дьиэ кэргэттэригэр үөрүүлээх быһыыга-майгыга туттарда.
«Ийэм, аҕам уонна мин – спортивнай дьиэ кэргэн» күрэхтэһии кыайыылаахтарын, бука бары кыттааччылары итиитик-истиҥник эҕэрдэлиибит! Инникитин даҕаны спорду өрө тутан, чэгиэн-чэбдик сылдьыҥ! Түгэнинэн туһанан, күрэхтэһиини тэрийбит оҕо спортивнай оскуолата уонна үөрэх салалтата спонсордарга – улуус баһылыгар Иннокентий Стручковка уонна нэһилиэктэр баһылыктарыгар Сергей Аликовка, Роберт Колесовка, Лев Гороховка махталларын биллэрэллэр.
Сардаана Копырина