Саха сиригэр тохсунньу 20 -24 күннэрэ, оҕо итэҕэллээх төлөпүөнүн (детский телефон доверия) туһунан сырдатыы нэдиэлэтинэн биллэриллибитэ.
Бу нэдиэлэ чэрчитинэн оскуола оҕолоругар анаан араас тэрээһиннэр ыытылыннылар
«Ол курдук, оскуола оҕолорун «Осикат» түмсүү лидердарыгар оҕо итэҕэллээх төлөпүөнүн туһунан сырдатар дьарык ыытылынна. Оҕолорго итэҕэллээх төлөпүөн суолтатын, кимнээх бу сулууспаҕа үлэлииллэрин, төлөпүөн үлэтин сүрүн бириинсиптэрин, ханнык ыйытыктаах, хайдах кыһалҕалаах буоллахха манна эрийэн тиийиэххэ сөбүн сиһилии кэпсээтибит. Ону таһынан лидер оҕолор кыра кылаас оҕолоругар итэҕэллээх төлөпүөн туһунан сырдатар уруоктары хайдах ытыахтарын сөбүн, кыраларга тиийимтиэ буоллун диэн, ханнык ньымалары туттуохтарын сөбүн туһунан сүбэ бэрилиннэ. Ол кэннэ «Осикат» түмсүү лидердара алын кылаастарга сүрдээх интэриэһинэй, сырдатар уроктары ыыттылар. «Тюгясирские зорьки» пресс-центр кэррэспэндьиэннэрэ итэҕэллээх төлөпүөн туһунан оҕолор төһө билэллэрин быһаарар ыйытынньык оҥорон ыыттылар. Маны тэҥэ, «Детский телефон доверия» видеоролик устан, Оҕо саас киинигэр көрдөрдүлэр. Улахан кылаас оҕолорун ортотугар «Лучшее селфи с детским телефоном доверия» диэн хаартыска күрэҕэ ыытылынна. Кыайыылааҕынан 8 «а» кылаас кэлэктиибэ тахсан, социальнай харалта салалтатын анал бирииһин тутан үөрдүлэр-көттүлэр.
Маны тэҥэ, Ленинград куорат блокадаттан босхоломмут күнүгэр аналлаах, 4 кылаас үөрэнээччилэригэр «Дети блокадного Ленинграда» уруок ыытылынна. Оҕолорго блокада кэмигэр кинилэр саастыылаахтара ыар олохторун, кинилэр тулуурдарын, улахан дьону кытта тэбис тэннэ куораттарын көмүскээн кыайыыны аҕалбыттарын туһунан презентация-бэсиэдэ оҥоһулунна. Түмүккэ, бүтүн Араассыйатааҕы «Блокадная ласточка» патриотическай аахсыйаҕа кыттыһан кумааҕыттан хараҥаччылары кырыйан оҥорон, кырааскалаан улахан ватман кумааҕыга сыһыардылар. Сүрдээх үчүгэй кэлэктиип үлэтэ тахсыбытын, оҕолор уонна учууталлар болҕомтолоругар оскуолаҕа ыйанна.
Тохсунньу 31 күнүгэр Дьарыктаах буолуу киин исписсэлииһэ Эверстов П.В. 8 кылаас үөрэнээччилэригэр «Информационная безопасность» тиэмэлээх көрсүһүү ыыттыбыт. Павел Васильевич оҕолорго сүрдээх тиийимтиэтик, интернет ситимигэр сэрэхтээх буолуу туһунан кэпсээтэ, туһалаах сүбэлэри биэрдэ. Көрсүһүү түмүгэр оҕолорго сырдатар – үөрэтэр буклеттары туттулар.
Түгэнинэн туһанан, социальнай харалта салалтатын аатыттан Р.И.Шадрин аатынан Саккырыыр орто оскуолатын дьаһалтатыгар тэрээһиннэри ыытарга сөптөөх усулуобуйа тэрийэн күүс-көмө буолалларыгар махталбытын тиэрдэбит, — диэн улууска Социальнай харалта исписэлииһэ Любовь Аверенская кэпсээтэ.