Социальнай хантараак ыра санааны олоххо киллэрэргэ төһүү өйөбүл

Билиҥҥи кэмҥэ дьоҥҥо туһалаах араас өйөбүл бырагыраама үгүс. Ымпыгын-чымпыгын билэн үөрэтэн ылыстаххына, аан барытыгар аһаҕас диэххэ сөп.

Ол курдук, бүгүҥҥү тиэмэбит дьоруойа Эбээн Бытантай олохтооҕо Оксана Медияйнен (Дыдаева), кини асчыт бэрдэ, тута сылдьан бурдук аһын, бэлэм эбиэттэри атыылыыра хамаҕатык барар.

Бу дьарыгын кэҥэтэр санааны иитиэхтээбитэ ыраатта.  Социальнай хантараак өйөбүлү туһаныан сөптөөҕүн чугас дьоно сүбэлээбиттэр. Оксана Юрьевна  сиһилии маннык кэпсиир: —“Ас эйгэтигэр үлэлээбитим 20-чэ сыл буолла. Дьокуускайга билэр киһибин кытта кафе арынан үлэлии сылдьыбытым, онтон манна 2015 сыллаахха кэлбитим. Манна кэлэн тэрилтэлэринэн сылдьан ас атыылыыр этим, сакааһынан оҥоробун. Маннык кафе арынар санаа үөскээбитэ олох ыраатта, бу баҕа санаабын олоххо киллэрэрбэр былырыын социальнай харалта нөҥүө хантарак түһэрсэн олоххо киллэрдим,  ымпыгын-чымпыгын быһаарсан, дьэ, быйыл үлэлээн саҕалаатым.

Бэйэ дьарыктаах буолуон баҕарар дьоҥҥо социальнай хантараак баара олус үчүгэй, туһалаах. Араас  хайысхаҕа дьыалаҕын арыныаххын сөп. Баҕалаахтары толлубакка хантараакка киириҥ,диэн ыҥырабын. Миигин «социальнай харалта үлэһиттэрэ барытыгар көмөлөһүөхтэрэ, сүбэлээн-амалаан биэриэхтэрэ, куттаммакка киир”, диэн бокуонньук убайым барахсан Роберт Барабанский көҕүлээбитэ. Аны санаатахха, кэриэс тылын этээхтээбит, киниэхэ махтана саныыбын маннык сүбэлээбитигэр.

Бизнес-  бырайыакпын оҥорорбор эдьиийим Светлана көмөлөспүтэ, буҕаалтыр киһи буолан, барытын суоттаан биэрбитэ.  Менюбун бэйэм астыырбынан оҥорбутум, араас омук аһа буолбакка, барыта дьиэтээҕи ырысыабынан, миин, соркуой, бэрэски диэбит курдук. Инник бизнес былааммын оҥорон биэрбитим, үчүгэй диэн сөбүлэһэннэр, социальнай хантарак өйөбүлүн ылбытым. Көмө харчыны ылаат да, отчуоттаан саҕалаабытым, тугу, туохха, хантан ылбыппын, туттубуппун биир сыл устата барыта бэрэбиэркэлэнэр. Инникитин хантараакка киирээччилэргэ, атыыласпыт чеккытын уура сылдьыҥ, диэн сүбэлиибин.

“У ДругА” диэн ааттаах кафебытын тохсунньу 30 күнүгэр арыйдыбыт, күн аайы үлэлиибит, онон кэлэн дьиэ аһын тото-хана аһааҥ, барыгытын үөрэ-көтө күүтэбит. Арыллыбыт күммүтүнэн, бу күн киирбит харчыттан аҥарын быстах хомуурга сылдьар уолаттарбытыгар көмө оҥорон ыытыахпыт, диэн дьиэ кэргэнинэн сүбэлэспиппит.

Түмүкпэр, бииргэ үөрэммит доҕотторбор, эдьиийбэр, социальнай харалта үлэһиттэригэр, улуус уонна олохтоох дьаһалталарга сүбэ-ама буолан көмөлөспүттэригэр улахан махталбын тиэрдэбин.

Дария Семеновнаҕа, убайым Роберт кэргэнигэр кэлэн кафебыт иһинээҕи үлэтигэр сүбэ-ама биэрэн көмөлөспүтүгэр махтанабын. Уонна кэргэммэр, уус буолан барытын бэйэтэ соҕотох оҥордо.»

Сөбүлүүр дьарыгын дохуот киллэрэр дьыалатыгар кубулутан үлэлээн эрэр Оксана Юрьевнаҕа үрдүк ситиһиилэри, ылсыбыта ыпсарыллан,  сатанан иһэригэр баҕарабыт! Ыра санаатын олоххо киллэрбитинэн өссө төгүл эҕэрдэлиибит!

Бу сүрдээх табыгастаах социальнай хантараак диэн өйөбүл туһунан,  социальнай харалта исписэлииһэ Александра Устинованы сиһилии кэпсииригэр көрдөстүбүт. Инникитин бэйэ дьыалатын саҕалааччыларга, хантараак туһунан билиэн баҕалаахтарга туһалаах буоллун диэн.

 «Оксана Юрьевна 2022 сылга мини-кафе арыныам этэ социальнай хантараакка киирбитэ. Ирдэбилгэ  барытыгар хапсан, 300 тыһ.солк. сууммалаах өйөбүл харчы биэрбиппит.

Бу сылга хантараакка кэккэ уларыйыылар киирдилэр.  Саҥа уураах тахсыбыта, билигин ону үөрэтэ сылдьабыт.  Уураахха олоҕуран өйөбүл  харчы сууммата 500 тыһ. диэри үрдээбит.

Маннык социальнай хантараак тиийинэн олоруу алын кээмэйиттэн кыра дохуоттаах ыалга, соҕотох олорор киһиэхэ, үлэлиир саастаах биэнсийэлээххэ  дьоҥҥо ананар.

Бастатан туран, Налог.ру регистрацияланыахтарын наада, сайабылыанньаларын уонна ирдэнэр докумуоннары олохтоох дьаһалтаҕа хомуйан туттараллар.

Социальнай хантараакка ирдэнэр докумуоннар манныктар:

  • Пааспар куопуйата, эбэтэр сайабылыанньа биэрээччини уонна дьиэ кэргэнин туоһулуур докумуон куопуйатын;( копии паспортов или копии других документов, удостоверяющих личность заявителя и членов семьи);
  • Эр, ойох буолары туоһулуур докумуон, оҕо төрөөбүт сибитиэтилистибэтэ(документы, подтверждающие родственные отношения (свидетельство о браке,

свидетельство о рождении, об усыновлении (удочерении), судебные решения);

  • в)справки, подтверждающие доходы членов семьи получателя за три последних календарных месяца, предшествующих одному календарному месяцу перед месяцем подачи заявления о предоставлении государственной социальной помощи;
  • г) выписка из похозяйственной книги администрации муниципального образования, подтверждающая наличие земельного участка;
  • д) трудовая книжка установленного образца и (или) сведения о трудовой деятельности, в том числе с использованием системы межведомственного электронного взаимодействия;
  • е) реквизиты лицевого счета;
  • Ж) бизнес-план для осуществления предпринимательской деятельности, план развития личного подсобного хозяйства с указанием планируемых мероприятий, сроков их реализации и расчета финансовых затрат (смета);
  • з) документ, подтверждающий факт нахождения в трудной жизненной ситуации:

Олохтоох дьаһалтаҕа киирбит сайабылыанньалары барытын биһиэхэ социальнай харалтаҕа ыытар, онтон биһиги көрөн, сүүмэрдээн, хапсар дьоҥҥо өйөбүл харчыны ыытабыт. Сыл устата хонтуруоллуубут, бу көмө харчыны ылан туохха, хайдах туһаммыттарын.»

Судаарыстыба өйөбүлэ сүрдээх төһүү өйөбүл. Онон, харса суох санаабыккытын саргылаан, баҕарбыккытын олоххо киллэрэн, бэйэҕит да, төрөөбүт түөлбэҕит да социальнай – экэнэмиичэскэй балаһыанньатын тупсарарга социальнай хантараак – бэртээхэй суол.

 

 

 

Марианна СЛЕПЦОВА