Саха Өрөспүүбүлүкэтин Судаарыстыбаннаһын күнүгэр «Гарпан» этнокултуурунай кииҥҥэ «Көмүс күһүн түгэннэрэ» тэрээһин түөлбэлэр кыттыылаах олус сэргэхтик ыытылынна.
Бу күн үөрүүлээх чаас кэнниттэн «Күһүҥҥү долгураҥ» түөлбэннэн көмүс күһүн бэлэхтэриттэн фотозоналары көрүү, “Эн миэхэ, мин эйиэхэ” сүүйтэриитэ суох лоторея, атыы-эргиэн дьаарбаҥката, араас викториналар, эҕэрдэ нүөмэрдэр уо.д.а. сэргэх тэрээһиннэр буоллулар.
Түөлбэлэринэн күрэххэ «Осикат», «Ферма», «Омукчаан» көхтөөхтүк кыттаннар, ас арааһын, эгэлгэтин сандалы устун хоточчу ууран, фотозоналары киэргэтэн бэртээхэйдик бэлэмнэммиттэрэ көрүөххэ астык! Бу манна бааллар оҕуруот аһын, барыанньа, отон арааһа, балык, кус, минньигэс бурдук астар уо.д.а. «Осикат” түөлбэ олохтоохторо Александра, Михаил Колесовтар эмтээх оттортон чэй өрөн бар дьоннорун күндүлээбиттэрэ үрдүк биһирэбили ылла, ону ааһан мөһөччүктээх хатарыллыбыт оттору кэлбит дьоҥҥо чэй оҥостон иһэллэригэр бэлэх уунан эбээн киһитин үтүө сиэрин көрдөрдүлэр.
Түөлбэлэринэн күрэх түмүгүнэн нэһилиэк олоҕор мэлдьи көхтөөх кыттыыны ылар «Осикаттар” 1 миэстэни ылыаҕын ыллылар! Үрүҥ илгэ астаах “Ферма” түөлбэ бочуоттаах 2 миэстэни, “Омукчаан” түөлбэ 3 миэстэни ситистилэр. Көхтөөх кыттыыны ылбыт түөлбэлэргэ, кыайыылаахтарга Түгэһиир нэһилиэгин олохтоох дьаһалтата харчынан сертификаты бириис туттарда.
Дойду дьонунан баай диэн мээнэҕэ этиллибэт. Биһиги улууспутугар дэгиттэр үлэһит, бары өттүнэн талааннаах, ураты дьоҕурдаах, үтүө майгылаах дьон үгүстэр. Саха Өрөспүүбүлүкэтин судаарыстыбаннаһын күнүнэн чулуу дьоммутун бэлиэтээн, улуус бочуоттаах олохтооҕо Гаврил Горохов баһаарынай чаас инструкторыгар Виктор Ефимовка “Эбээн-Бытантай улууһун бочуоттаах олохтооҕо” үрдүк ааты туттарбыта долгутуулаах түгэн буолла. Маны тэҥэ Түгэһиир нэһилиэгин баһылыга Сергей Аликов Виктор Егоровичка “Түгэһиир нэһилиэгин бочуоттаах олохтооҕо” ааты туттарбыта икки бүк үлүскэн үөрүүнү бэлэхтээтэ. Улуус баһылыгын солбуйааччыта Раиса Старостина улуустааҕы киин балыыһа суоппарыгар Валерий Никитиҥҥа “Эбээн-Бытантай улууһун бочуоттаах олохтооҕо” албан ааты туттаран, дохсун ытыс тыаһынан дойдулаахтара эҕэрдэлээтилэр.
Бу күн ырыа-тойук, үҥкүү-битии дьиэрэйэн, тэрээһиҥҥэ кэлбит дьон астынан, дуоһуйан тарҕастылар.
Сардаана Копырина