СӨ Ил Дархана Айсен Николаев көҕүлээһининэн олохтоммут 100 тыһ. солк. кээмэйдээх бириэмийэ Сахабыт сирин 36 бастыҥ педагог-настаабынньыгар туттарыллыаҕа. Кинилэри улуус уонна куорат уокуруктара куоластааһын түмүгүнэн бэйэлэрэ таллылар.
«Бастыҥ педагог-настаабынньык” куонкурус бастакы түһүмэҕэр, ол эбэтэр кандидаттар портфолиоларын көрүүгэ, настаабынньык уонна иитиллээччи анкетатын толорууга уопсайа 6 учуутал кыттыбыта. 12 киһилээх куонкурус хамыыһыйатын дьүүлүнэн иккис түһүмэххэ– уопсастыбаннай куоластааһыҥҥа А.С. Садовников аатынан Дьарҕаалаах орто оскуолатыттан Нина Степановна Софронова уонна Р.И. Шадрин аатынан Саккырыыр орто оскуолатын английскай тылын учуутала Елена Алексеевна Михайлова үрдүкү баалы ылан тахсыбыттара. Куоластааһын «Вконтакте” социальнай ситимҥэ ыытыллан, ол түмүгүнэн Елена Михайлова кыайыылааҕынан таҕыста», — диэн улуустааҕы үөрэҕирии салайааччыта Петр Потапов сырдатта.
«Мин Саккырыыр орто оскуолатыгар 2015 сыллаахтан омук тылын учууталынан үлэлиибин. Былырыыҥҥы үөрэх дьылыттан саҕалаан саҥа үлэлии кэлбит эдэр учууталга Николай Сухановка настаабынньыгынан анаммытым. Уһуйар үлэм сүрүн сыала-соруга диэн эдэр учууталга күүс-көмө, өйөбүл буолуу, үөрэнээччилэри чинчийэр үлэҕэ сыһыарыы, уһуйуллааччыбын үлэ ыарахан кэрчиктэрин кыһалҕата суох ааһарыгар үлэлэһии.
Былырыыҥҥы үөрэх дьылыгар улахан ситиһиибит диэн «Учитель – профессия мужская” учуутал идэлээх эр дьон өрөспүүбүлүкэтээҕи куонкурустарыгар кыттан, икки анал аат – «Дебют года”, “Учитель ученических признаний” кыайыылаахтара буолбуппут. Иннибитигэр өссө да ситиһиилээх үлэлэр тахсыахтара диэн бигэ эрэллээхпит, былааммыт киэҥ, үлэбит саҥа саҕаланна», — диэн Елена Алексеевна үөрүүтүн үллэһиннэ.
«Бастыҥ педагог-настаабынньык” куонкурус кыайыылааҕар Елена Михайловаҕа итии-истиҥ эҕэрдэ буолуохтун! Оҕону үөрэххэ-билиигэ угуйар сырдык-кэрэ аналынан үгүс ситиһии арыаллаах, мэлдьи кыайыы-хотуу кынаттаах буоларыгар баҕарабыт.