Сахабыт төрүт оонньууларын өрө тутан

Ааспыт субуота күн Кустуурга  улуустааҕы саха омук төрүт оонньууларыгар — хабылык, хаамыска ону таһынан аан дойдуга аатыран эрэр оонньуубут  мас тардыһыы көрүҥнэригэр күрэх өрө  күүрүүлээхтик ыытылынна.

Бу күрэх сүрүн сыалынан, быйылгы буолаары турар «Манчаары оонньуулара -2025 с.». улууспут хамаандатын састаабыгар бастыҥнары талыы буолар. Кыһыл көмүс мэтээли ылбыттар, «Манчаары оонньууларыгар» өрөспүүбүлүкэтээҕи сүүмэрдиир күрэхтэргэ кыттар кыах ылар.

Күрэҕи улуус баһылыгын солбуйааччыта Саргылана Петрова эҕэрдэ тыл этэн арыйда. Саккырыыртан 2 массыынанан кыттааччылар кэлэннэр, тыҥааһыны күүркэттилэр, тупсардылар. Кулууп тобус толору сэргэх көрөөччүнэн туолла. Ыалдьааччылар күрэхтэһии бүтүөр диэри ыһыы-хаһыы, ыалдьааһын күүстээҕэ манна буолла. Бары да кыайардыы — хотордуу бэлэмнэнэн кэлэн, дьулуурдаахтык  күрэхтэстилэр. Суудьуйаларынан Кустуур орто оскуолатын физкультураҕа учуутала М.И.Горохов, В.А. Попов, И.Е.Колесов, Саккырыыр орто оскуолатын физкультураҕа учууталлара  Л.П.Попов, Б.А. Кириллин буоллулар.

50 киилэ ыйааһыҥҥа 2 эрэ кыттааччы Кустуур оскуолатын 9 кылааһын үөрэнээччилэрэ кииристилэр. Кыайыылааҕынан Святослав Слепцов таҕыста. Онтон 6О киилэҕэ 6 эр бэртэрэ күөн көрүстүлэр. Манна 11 кылаас үөрэнээччитэ Другин Вася (КОО) кыраһыабайдык кыайан,  тиэхиниькэни күүскэ баһылаабытын көрдөрөн, муҥутуур кыайыылаах аатын сүктэ. Иккис миэстэни 9 кылаас уерэнээччитэ Айаал Колесов (СОО) эрэллээхтик ылла. Онтон үһүс миэстэни Денис  Иванов (СОО) ылла. Уолаттар бары даҕаны кыайарга дьулуһан, туох баар күүстэрин -уохтарын биэрэн туран кытыннылар.

65 киилэҕэ 4 эр бэртэрэ күөн көрүстүлэр. 10 кылаас үөрэнээччитэ Сеня Горохов (КОО) эрэллээхтик маҥнайгы миэстэни ылары ситистэ. Иккис  миэстэни Костя Горохов (КОО), үһүс миэстэни Илья  Старостин  (КОО) ыллылар. Оҕолорго 65 кг үөһэ ыйааһыҥҥа Антон Старостин соҕотох кыайан таҕыста. Күрэҕи олохтоох дьаһалта үлэһитэ Михаил Боярскай олус кэрэхсэбиллээхтик комментарийдаан, күрэхтэһиини өссө тупсарда.

Мас тардыһыытыгар оҕолор, эдэр ыччаттар  бэйэлэрин икки ардыларыгар абсолютнай буолла. Күрэххэ кыттыбыттар бары күөн көрүстүлэр, күүстэрин — уохтарын холоннулар, убайдартан уопут да ыллылар. Ол курдук 65 киилэҕэ эдэр ыччаппыт Сыроватский Владимир муҥутуур кыайылаах буолла. Онтон II миэстэни Уйгулан Горохов ылыан ылла.

65 киилэ ыйааһынтан үөһэҕэ элбэх кыттааччы  күөн көрүстэ. Маҥнайгы миэстэни Семен  Горохов (КОО,10 кыл.), иккиһи Костя Горохов (КОО,11 кыл.), үсүһү Антон Старостин (СОО,9 кыл.) ыллылар. 75 киилэҕэ 4 кыттааччыттан Иван Горохов ыраастык кыайыыны ситистэ. Иккиһи Илья Аммосов. Манна бэтэрээн Алексей Баишев бэйэтин холонон көрдө, эдэр ыччакка үтүө холобур буолар. 85 киилэҕэ ыччат лидера Нюргустан Слепцов Горохов Иванныын, иккиэн кустуурдар, күөн көрүстүлэр. Түмүккэ,  Иван Горохов кыайыылаах үрдүк аатын сүктэ.

Хабылык, хаамыска күрэхтэрэ эмиэ үгүс сэҥээриини ыллылар.   Оскуола  оҕолоругар уолаттарга 12 кыттааччыттан Семен  Горохов (КОО) тэҥнээҕин булбата, чаҕылхайдык кыайда. Кини кэнниттэн 7 кылаас үөрэнээччитэ Проня Старостин 2 миэстэни эрэллээхтик ылла. Хабылыгын дьарыктаннаҕына инникитин улахан ситиһиини ылыан сөп эбит. Онтон 3 миэстэни Вася Другин (КОО) ылла.

Кыргыттарга маҥнайгы миэстэни уһулуччу бэлэмнээх буолан, Саккырыыртан Анастасия Алексеева 1 миэстэни ылары ситистэ. 2 миэстэ Мотя Горохова  (КОО), үсүһү Люда  Старостина (КОО) ыллылар.

Кэрэ аҥардарга 19-34 саастарыгар диэри 6 кыттааччы киирдэ. Саккырыыртан физкультура учуутала Лаура Попова бастыҥ көрдөрүүнү ситистэ. 2 миэстэни устудьуон Татьяна Слепцова, үсүһү Любовь Горохова ыллылар. Кыргыттар бары да бэрткэ оонньоотулар.

19-39 диэри саастаах эр дьоҥҥо 4 эр бэртэрэ кииристилэр. Улуус кииниттэн учуутал Борис  Кириллин хаамысканы оройуттан өрө туппутун көрдөрөн бэрткэ оонньоото уонна эрэллээхтик бастаата. Иккис миэстэни Аллараа Бытантай олохтоох дьаһалтатын үлэһитэ Иван Горохов ылла. Үсүһү Кустуур нэһилиэгэр ыччат лидерэ Нюргун Слепцов ситистэ.

Эр дьоҥҥо 40-60 саастаахтарга учуутал Михаил Горохов, иккис миэстэни Иннокентий Колесов, үһүс миэстэни Мир Слепцов, Оҕо саас киинин педагога ылла.

Кэрэ аҥардарга 35-55 саастарыгар диэри 1 миэстэни Анжела Слепцова «Кэнчээри» уһуйаан иитээччитэ, 2 миэстэни Надежда Колесова «Кэнчээри» уһуйаан үлэһитэ, 3 миэстэни Горохова Елена Афанасьевна,  КОО учуутала ыллылар.

Түмүктээн эттэххэ,  остуол оонньуулара түргэн хамсаныыны, имигэс тарбаҕы эрэйэр. Оҕону орто сүһүөхтэн саҕалаан утумнаахтык дьарыктаатахха үрдүк ситиһиилэр кэлэ туруохтара. Аҥардас тренер эрэ дьарыга буолбакка,  дьиэ кэргэн тула оонньуулара улахан суолталаах. Өбүгэбит оонньууларын өрө тутан, сайдан, сайыннара иһиэххэ.

Бу күрэҕинэн тохтоон хаалбакка, нэһилиэкпит иһигэр спорт көрүҥнэригэр бары тэрилтэлэр кыттыһан туран ыытыллаллара үчүгэй эрэ түмүктээх буолуо этэ. Аҥардас  спортсменнарга эрэ буолбакка, уопсастыба нэһилиэк олохтоохторугар сэргэхсийиини, чөл олоҕу эрэ түстүүр.  Өбүгэбит оонньууларын сөргүтэн, тыҥааһыннаах күрэхтэһии нэһилиэнньэни сэргэхситтэ, спорду сэҥээрээччилэр дуоһуйан, астынан тарҕастылар.

Надежда Слепцова, КОО иитэр үлэҕэ дириэктэр.

Читайте дальше