Саха мааны бырааһынньыга – Ыһыах!

Былыр былыргыттан Ыһыах күнү бэлиэтиир, кэрэһэлиир сүрүн күрэҕинэн ат сүүрдүүтэ буолар. Оччоттон баччаҕа диэри, ат сүүрдээччилэр улуустарынан, нэһилиэктэринэн кэрийэ сылдьан күрэс былдьаһан кыахтарын холоноллор.

Ааспыт сылга Верхоянскай куорат 385 сыллаах үбүлүөйдээх Үрүҥ Тунах Ыһыаҕар 48 сүүрүүк аттаах 8 хамаанда күөн көрсүбүттэрэ. Манна  биһиги сылгыһыт уолаттарбыт тиийэннэр,  Эбээн Бытантай аатын ааттатан, өтөрүнэн буолбатах көстүүнү бэлэхтээн, кыайан-хотон, ситиһии өрөгөйдөнөн, бар дьон сөҕүүтүн-махтайыытын ылан кэлбиттэрэ уостан түспэт үтүө сонун буолуоҕун буолбута.

Бу күннэргэ Дьааҥыга Адыаччы нэһилиэгин үбүлүөйдээх Ыһыаҕар, биһиги ат сүүрдээччи уолаттарбыт төрдүө буолан, Саккырыыртан атынан айаннаан, Дьааҥы өрүһүн аттарын харбатан туоратан, салҕыы “Камаз» массыынаннан илдьэллэр. Верхоянск-Баатаҕай-Адыаччы айанныыр суол 130 килэмиэтир усталаах. Маннык уустук айаны этэҥҥэ туораан, сыалларын ситиһэн, кыайыы кынаттаах кэллиннэр диэн, биир дойдулаахтарын ааттарыттан баҕа санаабытын тиэрдэбит.

(видео ватсапп ситимиттэн)