Тыа сирин сайдыыта сөптөөх салайыыттан, дьон – сэргэ биир сомоҕо буолуутуттан уонна соруктаах быһаарыылартан тутулуктанар.
Аллараа Бытантай нэһилиэгэр олох – дьаһах, үлэ – хамнас хаамыытын баһылык Роберт Колесов биһиги уопсастыбаннай кэррэспэндьиэммитигэр кэпсээтэ.
- Олоруу кэминэн. Халаан сылыйан үлэ – хамнас тэтимирдэ. Бу сайын биһиэхэ саҥа хочуолунай тутуллуохтаах, оччотугар бөһүөлэк 100% киин ититиигэ холбонуохтаахпыт. Саҥа оскуола – саад тутулларыгар толору бэлэм буолабыт. Хочуолунайбыт матырыйааллара толору тиэллибиттэрэ, ыам ыйын бастакы күннэриттэн бэдэрээччик үлэтин саҕалыыр. Маны тэҥэ, тутулла турар 4 кыбартыыралаах дьиэ ситэриллиэҕэ, эдэр исписэлиистэргэ дьиэ эмиэ үлэҕэ киириэхтээх. Матырыйааллар бүтэһик суолу баттаһа тиэллэн иһэллэр. Анал дьайыыга сылдьар байыастарбытын умнубаппыт. Байыастарбыт дьонноругар бары өттүнэн көмөлөһө сатыыбыт. Ол курдук, уолаттарбыт дьонноругар киин ититиигэ хообонооччуларга турбаларын барытын куораттан ылан тиэйдибит, маны таһынан наадыйар матырыйаалларынан барытын хааччыйыахпыт. Быйыл сэттэ ыалга мас түһэрэн көмөлөстүбүт. Саха сиригэр Оҕо саас, дойдуга Дьиэ кэргэн сылларын чэрчилэринэн үгүс тэрээһиннэр былааннана ыытыллаллар. Бу күннэргэ «Аҕа уонна уол оҕо» күрэҕин ыыттыбыт. Сүрдээх сэргэхтик буолан ааста. Халлаан сылыйбытынан ырааһырдыы субуотунньуктарбытын саҕалыахпыт. Сылын аайы маннык субуотунньуктарга олохтоохтор күргүөмүнэн тахсан, көхтөөхтүк кытталлар. Тыа хаһаайыстыбатынан дьарыктанар дьоммутун эмиэ өйүүбүт. Кэккэ сылларга гаас тэриллэрин ылан биэрэбит. Быйыл 1 сайаапкалаахпыт, Сотору тиэллэн кэллэҕинэ тутатына түҥэтиэхпит!
Биир дойдулаахтарбар кытаанах доруобуйаны, или – эйэни баҕарабын! Түмсүүлээх, көхтөөх буолуохха, оччотугар биһиги барытын кыайыахпыт!
Кэпсэттэ Тамара Шадрина
Хаартыскаҕа түһэрдэ Михаил Боярский