Эбээн-Бытантай улууһугар «Сыл бастыҥ иитээччитэ” куонкурус муниципальнай түһүмэҕэ буолла. Бу туһунан улуустааҕы үөрэҕирии салалтатын оскуола иннинээҕи үөрэхтээһин исписэлииһэ Мария Чупрова сырдатта.
«Олунньу ый 20-21 күннэригэр улууспут киинигэр Саккырыырга «Сыл бастыҥ иитээччитэ” куонкурус муниципальнай түһүмэҕэ икки күн устата буолла.
Күрэхпит 7 түһүмэхтэн турда: бэйэни билиһиннэрии, портфолио кэтэхтэн, ону тэҥэ «педагогическое мероприятие с детьми», «моя педагогическая находка», «решение профессиональной задачи», «мастерская педагога», «семинар для родителей» түһүмэхтэр.
Быйылгы күрэххэ Саккырыырдааҕы «Хаарчаана” оҕо уһуйаанын иитээччитэ Амгаяна Бочкарева, Кустуурдааҕы “Кэнчээри” оҕо уһуйаанын логопед-учуутала Прасковья Горохова, оскуола иннинээҕи бөлөхтөөх С.А. Садовников аатынан Дьарҕаалаах орто оскуолатын иитээччитэ Валерия Горохова кытыннылар.
Дьүүллүүр сүбэҕэ улуустааҕы үөрэҕирии салайааччытын солбуйааччы, бэрэссэдээтэл Лаура Иванова, үөрэҕирии салалтатын хаадыр уонна юридическай боппуруостарга исписэлииһэ Надежда Аммосова, улуустааҕы социальнай харалта салалтатын педагог-психолога Акулина Чупрова кыттааччылары сыаналаатылар.
Мин санаабар, куонкурус саамай долгутулаах уонна эппиэтинэстээх түһүмэҕинэн кыракый иитиллээччилэри кытары тэрээһин буолла. Бары педагогтар олус бэлэмнэммиттэрэ тута харахха көстөр. Икки күн устата сүрдээх интэриэһинэй үлэлэри көрдүбүт-иһиттибит.
Бу курдук тэрээһин түмүгүнэн «Сыл бастыҥ иитээччитэ» күрэх муҥутуур кыайыылааҕынан Кустуур нэһилиэгин уһуйаанын педагога Прасковья Горохова буолла. «За профессионализм и верность традиционным духовно-нравственным ценностям» анал ааты Амгаяна Бочкарева сүктэ, «За преданность и высокую профессиональную эффективность» — Дьарҕаалаахтан Валерия Горохова буоллулар.
Түгэнинэн туһанан, тэрээһини ыытарга күүс -көмө буолбут «Харчаана» уһуйаан бүтүн кэлэктиибигэр, сэбиэдиссэйи солбуйааччыга Фаина Ивановна Колесоваҕа муҥура суох махталбытын тиэрдэбит,» — диэн Мария Афанасьевна сырдатта.
Сардаана Копырина