Дьокуускай куоракка анал байыаннай дьайыы кыттыылаахтара, доҕордуу саллааттар Иван Горохов уонна Герман Ефимов “Быстах хомуур” тиһэх ырыалара саха эстрадатын тыйаатыгар «Орто дойдуга хаалларар кэриэһим» аһымал кэнсиэр кэмигэр сүрэхтэннэ.
Уолаттарбыт сэрии толоонугар сылдьан, хорсун буойуннар тустарынан суруйан хаалларбыт ырыалара Сахабыт сирин бар дьонун истиитигэр тахсарыгар, итиэннэ саха эстрадатын биллэр-көстөр чаҕылхай ырыаһыттара кыттыылаах улахан кэнсиэр тэриллэригэр биһиги улууспутуттан волонтер кыргыттарбытын тэҥэ үтүө санаалаах, ис дууһаларыттан ыалдьар биир дойдулаахтарбыт мустаннар, сүүрэн-көтөн, кэпсэтэн-ипсэтэн, ахтыы киэһэтэ дойду көмүскэлигэр сылдьыбыт уолаттарбытыгар сүгүрүйүү бэлиэтэ буолла. Онтон кэнсиэр кэмигэр киирбит үп-харчы анал байыаннай дьайыы кыттыылаахтарыгар көмөҕө бэрилиннэ. 
Биир дойдулаахпыт Дмитрий Саввинов:
- Уолаттарбыт Иван Горохов уонна Герман Ефимов тиһэх суруйан хаалларбыт «Быстах хомуур” ырыалара сүрэхтэннэ. Волонтер кыргыттарбыт Акулина Колесова, Лия Николаева, Иван Горохов тапталлаах кэргэнэ Лида Суханова, Дмитрий Акимов, Максим Дмитриев, биир дойдулаахтарбыт Виктор Остриков, Илья Колесов, Оталан Ущницкий буоламмыт, биир халыҥ хамаанда тэринэн, сүүрэн-көтөн, үлэлээн-хамсаан аһымал кэнсиэр тэрилиннэ, уолаттарбыт тиһэх ырыалара сүрэхтэннэ.
Сүрдээх үчүгэй, сылаас-сырдык эйгэлээх ахтыы киэһэтэ буолан ааста. Саха эстрадатын тыйаатырын саалатыгар толору көрөөччү муһунна. Түгэнинэн туһанан, бу дьоро киэһэ тэриллэригэр бииргэ үлэлэспит дьоммор махтанабын, бары түмсүүлээх, биир сомоҕо санаалаах буоламмыт барыта уурбут-туппут курдук табылынна. Саха эстрадатын ырыаһыта, Дьарҕаалаахтан төрүттээх уолбут Оталан Ушницкай эстрада тыйаатырыгар кэнсиэр ыытылларын кэпсэтэн, Сахабыт сирин биллэр ырыаһыттарын кытыннарбытыгар, Германнаах Ваня тиһэх ырыаларын толорбут Максим Дмитриевка уонна кэнсиэргэ кэлбит бар дьоммутугар муҥура суох махтанабыт!
Илья Колесов, кэнсиэри иилээн-саҕалаан ыыппыт биир дойдулаахпыт:
- Уолаттарбыт кэнсиэртэригэр халыҥ хамаанда буоламмыт, бары биир сүбэнэн, санаанан, биир түмүккэ кэлэммит, дьоро киэһэбит бэрткэ сатанна. Уолаттарбыт бэйэлэрэ даҕаны үөһээттэн көрөн көмөлөспүт курдуктар.
Дмитрий Олегович кэпсээбитин курдук араас хайысханан, ким туохха эппиэттээҕинэн арахсаммыт үлэлээбиппит. Кэнсиэри иилээн-саҕалаан ыытарга тутатына үөрэ-көтө сөбүлэспитим. Тоҕо диэтэргин, уолаттарбыт Германнаах Уйбаанчык олорон ааспыт олохторун кыра эрдэхпититтэн бииргэ улааппыт дьонум буолан билэбин. Доҕотторум өйбөр-санаабар, сүрэхпэр мэлдьи баар буоланнар сценаҕа туран көрөөччүлэргэ сөпкө тириэртим быһылаах дии саныыбын.
Кэнсиэрбит үрдүк таһымнаахтык ааста. Германнаах Уйбаанчык олус да үчүгэй ырыаны суруйан хаалларбыттар, бу ырыалара көлүөнэттэн көлүөнэҕэ бэриллэн, ыллана туруохтун! Сотору кэминэн бу ырыаҕа клип тахсыахтаах, онно эмиэ биир дойдулаахтарбыт үлэлэһэ сылдьаллар.
Кэнсиэргэ кэлэн барбыт, ыалдьыттаабыт дьоҥҥо барыларыгар барҕа махтал!
Кэнсиэр кэнниттэн сэргэх көрөөччү, улуус хаһыатыгар өр сылларга үлэлээбит Мария Чукрова санаатын үллэһиннэ:
— «Быстах хомуур” диэн уолаттарбыт тылларыгар уонна матыыбыгар ырыа сүрэхтэниитигэр сырыттым. Олус долгутуулаах, аһыы харах уута сүүрүүлээх, истиҥ тэрээһин буолла.
Биһиги улууспутугар гастроллаабыт Сахабыт эстрадатын артыыстара кыттыыны ылбыттара тус бэйэбин астыннарда. Ваня Горохов оҕолор республикатааҕы «Хотугу сулус” күрэҕэр Аркадий Николаев (Эрхан) «Аэропорт» ырыатынан кыттыбытын, Герман Ефимов доҕотторун кытта эстрада артыыстарын Николай Андросов, Эрхан, Степан Афанасьевтыын Айаал төрөөбүт күнүгэр көрсүбүттэрин санаан кэллим…
Уолаттарбыт төрөөбүт дойдуларыттан Украина сиригэр тиийэн сэрии толоонугар сырдык тыыннара быстыбыта олус хомолтолоох, аһыылаах. Бу тэрээһиҥҥэ олорон саҥа иһиттим… Биһиги курдук аҕыйах нэһилиэнньэлээх кыра улуустан сэттэ уонтан тахса уолаттарга быстах хомуурга бэбиэскэ туттарбыттара киһини долгутта… Сэрии сүтүгэ суох буолбат…
Германнаах Ваня — Уйбаанчык суруйан хаалларбыт ырыалара киһи дууһатын кылын таарыйан, харахпар киинэ лиэнтэтин курдук субуллан көстөн ааста. Хараҕым уута ырыа ылланыаҕыттан бүтүөр дылы тохтообокко сүүрдэ… Эрэнэбин, уолаттар ис дууһаларыттан, сүрэхтэрин сылааһыттан, ийэҕэ, оҕоҕо, олоххо тапталларын, төрөөбүт дойдуга бэриниилэрин хоһоонноругар холбоон, ыпсарыылаахтык суруйан хаалларбыт айымньылара үйэлэр тухары норуот уоһуттан түспэккэ бу ырыа кый ыраахха дылы дьиэрэйиэ.
Сардаана Копырина