Полиция үлэһиттэрэ нус-хас олоҕу араҥаччылыыллар

Арассыыйа үрдүнэн Полиция күнэ сылын ахсын сэтинньи 10 күнүгэр бэлиэтэнэр. Устуоруйа быыһын сэгэтэн көрдөххө, 1917 с. бу кэмҥэ Арассыыйа Ис дьыалаларга народнай комиссариата (НКВД) «Оробуочай милиция туһунан» декрети ылынан, ити докумуон быһыытынан Үлэһит уонна саллаат дьокутааттар Сэбиэттэрин иһинэн үлэһит аймах милициятын олохтууллар. Устуоруйаҕа бу бэлиэ түбэлтэ официальнай таһымҥа РФ Президенэ Дмитрий Медведев 2011 сыл алтынньы 13 күнүнээҕи 1348№-дээх Ыйааҕынан “Российскай Федерацияҕа Ис дьыала уорганнарын үлэһиттэрин күнүнэн” бигэргэтиллибитэ.

Эбээн-Бытантайдааҕы полиция пуунугар күннэтэ дьыалаларыгар уһулуччу бэриниилээх, ис сүрэхтэриттэн кыһамньылаах уонна кыһалҕаҕа кыһарыйтарбыт киһиэхэ көмөнү оҥорорго бэлэм эдэр дьон үлэлииллэр. Бу эйгэ үлэһиттэрин чэпчэкитэ суох сулууспаларын туґунан Арассыыйатаа±ы Ис дьыала министиэристибэтин МО «Верхоянский» Эбээн Бытантайга ПП начаалынньыга Анжелика Саввинованы кытта кэпсэттибит.

Бастатан туран, идэлээх күммүтүнэн бары үлэлээн ааспыт дьоммутун, Ис дьыала бэтэрээннэрин М.П.Петровы, И.С.Макаровы, А.В.Константиновы, С.Н.Антонованы, билигин үлэлии сылдьар кэллиэгэлэрбин полиция майора, старшай учаскыабай — М.И. Березкины, полиция лейтенана, учаскыабай-А.Я. Слепцованы, старшай сержант, комендантскай бөлөх полицейскайа — Д.Р.Сметанины, сержант, комендантскай бөлөх полицейскайа – А.А.Захаровы, миграционнай сулууспа сотруднига – Х.И.Горохованы ис сµрэхпиттэн эҕэрдэлиибин! Үлэ – хамнас ситиһиилээх, тус олоххут дьоллоох буоллун, диэн баҕа санаабын тиэрдэбин. Биһиги кэккэбититтэн туораабыт ытыктыыр дьоммутун — бэтэрээммитин А.Г.Антоновы, улууска дьиэ кэргэн салаатын салайааччытынан үлэлээбит А.Д.Юмшанованы ахтан, бэлиэтээн ааһар тоҕоостоох. Кинилэр үтүө сүбэлэрэ, өрүү өйөбүллэрэ биһиэхэ күүс – көмө буолара. Эҥкилэ суох үлэлэрин сыаналыыбыт, өйдүүбүт.

Биһиги үлэбит сүрүн сыала — бэрээдэк көмүскэллээх буоларын ситиһии. Маныаха сокуону кэһии тахсыбатын туһугар эрдэттэн сэрэтии үлэтигэр болҕомтобутун туһаайабыт. Ол курдук, оскуола оҕолоругар бэсиэдэлэри ыытабыт, уһуйаан иитиллээччилэригэр олоххо-дьаһахха сэрэхтээхтик сылдьыы быраабылаларын үөрэтэбит, араас “методичкалары” биэрэбит. Улууспутугар  сокуону кэһии үксүн кэриэтэ уопсастыбаннай бэрээдэги кэһиигэ тахсара бэлиэтэнэр. Биллэн турар, аргы дьайыыта улахан. Хас биирдии киирбит сайабылыанньа сокуон хараҕынан көрүллэр, буруйдаахтар сөптөөх миэрэҕэ тардыллаллар. Матырыйаалынай -тэхиниичэскэй баасанан хааччыллыы өттө үчүгэй. Арай ыра санаабыт диэн, саҥа, ирдэбилгэ эппиэттиир дьиэ тутуллара буоллар.  Сырдыкка, киэҥҥэ-куоҥҥа үлэлиэ этибит. Түгэнинэн туһанан, биһигини кытта биир ситимнээхтик үлэлиир, бэрээдэги кэһиини бохсор туһааннаах тэрилтэлэргэ: УИИ старшай инспектора, ис сулууспа капитана — С.А.Стручковаҕа, ОЛРР инспектора, полиция капиатана – А.Б.Хабароваҕа, саастарын ситэ илик оҕолор хамыыһыйаларыгар, эпиэкэ салаатыгар, социальнай харалтаҕа, эрэдээксийэ кэллэктиибигэр, Оҕо уонна ыччат спортивнай оскуолатыгар, нэһилиэктэр дьаһалталарыгар, киин балыыһаҕа, оскуолаларга улахан махталбын тиэрдэбин.

Олохпут уоскулаҥ, көмүскэллээх буоларын туһугар күннэри – түүннэри сыраларын – сылбаларын ууран туран үлэлиир дурда – хахха дьоммутун Ис дьыала эйгэтин үлэһиттэрин, чуолаан Анжелика Валерьевнаны итиитик – истиҥник эҕэрдэлиибит! Ыра санааҕыт сотору кэминэн туолан, саҥа үлэлиир дьиэлэнэргитигэр баҕарабыт, чэгиэн туругу, этэҥҥэ буолууну баҕарабыт!