Эбээн-Бытантай улууһугар быйыл хас ыал сыһыаннарын сокуонунан бигэргэттэ? Хас кырачаан күн сирин көрдө? Улууспут тэриллибитэ үбүлүөйдээх 35 сылыгар – 35 сыл бииргэ олорбут дьоһун-мааны ыаллар кимнээҕий? Бу туһунан ЗАГС салайааччыта Елена Колесова сырдатта.
-Арассыыйаҕа Дьиэ кэргэн, Саха сиригэр Оҕо саас сылыгар быйыл биһиги улууспутугар 9 кырачаан күн сирин көрдө.
Биэс эдэр ыал сокуонунан сыһыаннарын бигэргэттилэр: Валерия, Бэргэн Слепцовтар, Анна Колесова уонна Арсен Слепцов, Дарина, Александр Борисовтар, Диана, Петр Баишевтар, Кристина Юмшанова уонна Егор Горохов. Оҕолорбутугар итии-истиҥ эҕэрдэ буолуохтун! Олоххут суола мэлдьи сырдык, тулалыыр эйгэҕит ыраас-чэбдик, сыһыаҥҥыт бөҕө-таҕа, иэйиигит уостубат күүстээх буоллун!
Быйылгы сылга үбүлүөйдээх ытык-мааны дьиэ кэргэттэр эмиэ элбэхтэр. Ол курдук, эн-мин дэсиһэн, сарын сарынтан өйөнсөн, 25 сыл бииргэ олорбут ыаллар Дьарҕаалаах нэһилиэгэр биир, Кустуурга үс, Түгэһииргэ үс ыал үрүҥ көмүс урууларын бэлиэтииллэр.
Онтон Эбээн-Бытантай национальнай улууһа тэриллибитэ 35 сыллаах үбүлүөйүгэр коралловай урууларын Кустуурга Анна Артемовна, Гаврил Иннокентьевич Слепцовтар, Ксения Дмитриевна, Алексей Афанасьевич Лукиннар, Түгэһиир нэһилиэгэр Татьяна Моисеевна, Василий Егорович Мушниковтар, Анна Фоковна, Ариан Федорович Макаровтар бэлиэтииллэр.