Амма улууһугар өрөспүүбүлүкэтээҕи Олоҥхо ыһыаҕа бэс ыйын 19-21 кк. буолар. Киэҥ ыҥырыылаах улахан түһүлгэҕэ биһиги улууспутуттан култуура үлэһиттэрэ бараннар тэрээһиннэргэ, куонкурустарга кыттыыны ылыахтара. Сиһилии култуура салайааччыта Степан Слепцов сырдатта.
«Олоҥхо ыһыаҕар култуурунай тэрээһиннэргэ култуура салалтатын методиһа Полина Пантелеймоновна Ефимова салайааччылаах 5 киһи барда. Өрөспүүбүлүкэтээҕи “Нимкан” эбээннии олоҥхо толоруутун күрэҕэр Кустуур орто оскуолатын дириэктэрин солбуйааччы Мария Денисовна Степанова, сахалыы тойук уонна оһуохай өрөспүүбүлүкэтээҕи күрэҕэр Кустуур орто оскуолатын эбии үөрэхтээһинин педагога Зинаида Анатольевна Колесова, «Хотугу түһүлгэ” куонкуруска эбээннии норуот ырыатын толоруутугар «Гарпан” этнокултуурунай киин үлэһитэ Мария Ивановна Аммосова уонна билигин Амма улууһун Сатаҕай нэһилиэгин култууратын дьиэтигэр үлэлии сылдьар Ньургуйаана Васильевна Потапова кыттыыны ылыахтара. Эбээн омук төрүт үҥкүүтэ – һээдьэ өрөспүүбүлүкэтээҕи күрэҕэр Мария Денисовнна уонна Ньургуйаана Васильевна кыттыахтара.
Өрөспүүбүлүкэтээҕи уус-уран оҥоһуктар күрэхтэригэр СӨ норуотун маастара Ньургуйаана Еремеевна Колесова, норуот уус уран оҥоһуктарын маастардара Елена Романовна Колесова, Туйаара Васильевна Колесова уонна улууспут уран тарбахтаах маастара Аграфена Терентьевна Корнилова үлэлэрэ бардылар.
Өрөспүүбүлүкэтээҕи национальнай бибилэтиэкэ тэрийэр «Сүүс олоҥхоһут” түһүлгэлэригэр Полина Пантелеймоновна кыттыаҕа», — диэн Степан Степанович сырдатта.