CӨ ситэриилээх былааһын оробуочай бөлөҕө Кустуур нэһилиэгэр сылдьан, ааспыт 2024 сылга ыыппыт үлэтин билиһиннэрдилэр. Оробуочай бөлөҕү СӨ Бырабыыталыстыбатын Бэрэссэдээтэлин I солбуйааччыта Дмитрий Садовников салайан кытыы нэһилиэк олоҕун-дьаһаҕын билистилэр, олохтоохтору кытары кэпсэттилэр.
Сыллата ыытыллар үтүө үгэс буолбут отчуот туруу үлэһит дьону уруйдууртан саҕаланна.
Учуутал Светлана Черепанова СӨ народнай учуутала, сэрии бэтэрээнэ Николай Афанасьев аатынан төрүт омуктар тылларын үөрэтиигэ уонна харыстабылга СӨ Ил Дарханын уонна Бырабыыталастыбатын Бириэмийэтин Дмитрий Садовников туттарда.
НэҺилиэк дьаһалтатын эдэр исписэлииһэ Михаил Боярскай СӨ Бырабыыталыстыбатын бэрэссэдээтэлин Ì солбуйааччыта Дмитрий Садовниковтан үтүө суобастаах үлэтин иһин Махтал сурук тутта.
Маны тэҥэ, оскуола уонна уһуйаан үлэһиттэригэр Валентина Колесоваҕа, Ньургуяна Другинаҕа, Андрей Мигалкиҥҥа СӨ үөрэхтээһиҥҥэ миниистирин солбуйааччыта Михаил Присяжный Бочуот кырааматаларын, Махтал суруктары туттарда.
НэҺилиэнньэ иннигэр отчуоттуур мунньах кэмигэр олохтоохтор олох уйгутун түстүүр этиилэрин, кыһалҕалаах боппуруостарын биэрдилэр. СӨ тырааныспарка, суолга- иискэ миниистир солбуйааччыта Андрей Потапов нэһилиэктэр икки ардыларынааҕы суоллар көрүүлэрин «Арктика суоллара» ХТ хааччыйыытыгар бэриллиэҕэ диэн эппитин, Аллараа Бытантай олохтоохторо ордук кэрэхсии иһиттилэр. Бэлиэттээн эттэххэ, улуус кииниттэн Кустуурга диэри 100 км., онтон Саккырыыр- Дьарҕаалаах хайысха 76 км.
Маны тэҥэ үрдүк сололоохтор оскуолаҕа, саҥа тутуллубут мас кыырпаҕынан оттуллар хочуолунайга, саха сүөһүтүн хотонугар сылдьан үлэни-хамнаһы билистилэр.
Бүгүҥҥү күҥҥэ Кустуур орто оскуолата эргэ дьиэни оҥостон үлэлиир. Манна 91 оҕо үөрэнэр. Эбийиэк тутуута өрөспүүбүлүкэҕэ иккис уочаракка турар. Билиҥҥи кэмҥэ улуус салалтата бырайыактыыр-симиэтэлиир докумуоҥҥа чопчулааһыны киллэрии үлэтин ыытар. Эрдэ оскуола тутуута, сыанатынан да, тиэйиитинэн да табыгаһа суох 1 млрд. солк. үбүлээһини ирдиирэ. Маннык үрдүк үбүлээһин кыайтарара харгыстардааҕынан, улуус дьаһалтата эбийиэк тутуутун 150 мөл.солк. чэпчэтэргэ үлэ ыытта. Санатан эттэххэ, оскуола дьиэтэ 2020 сыллаахха уокка былдьаммыта.