Эбээн Бытантай улууһа тыа хаһаайыстыбатын үс сүрүн салаатын – табаны, сылгыны, ынах сүөһүнү иитиини тэҥинэн тутар ураты оройуон буолар. Онтон бу салааларга үлэлиир тыа сирин сэмэй дьоно – улуус уйгутун түстээччилэр. Кинилэргэ ураты болҕомто ууран, санаторнай-курортнай сынньаныыны тэрийии тиһиктээхтик ыытыллар.
«Тыа хаһаайыстыбатын үлэһиттэрэ, икки ынах сүөһү иитиитинэн дьарыгырар дьоммут «Сибирь” диэн Алтайскай кыраайга баар эмтэнии, сынньаныы санаторийыгар барар чиэскэ тигистилэр. Эмтэнэ барар киһи путевкатын СӨ тыа хаһаайыстыбатын министиэристибэтэ 80% төлүүр уонна 20% улууспут салалтата Тыа хаһаайыстыбатын сылынан уйунар, баран кэллэхтэринэ министиэристибэ бырайыастарын барытын 100% толуйууну онорон төлүүр. Ол курдук, биһиги улууспутуттан бараллар: Слепцова Светлана Дмитриевна – «Саха сүөһүтэ” хааһына тэрилтэтин Саккырыырдааҕы салаатын зоотехнига, ынах сүөһүнү иитэн тэнитэр урбаанньыт Стручков Афанасий Петрович. Дьоммут балаҕан ыйын бүтүүтүгэр, от үлэтэ бүппүтүн кэннэ бараллар.
Бу маннык путевканы туһанан барыан баҕалаах тыа хаһаайыстыбатыгар үлэлиир дьоммутугар докумуоннарыгар үлэлэһэн, хаһан барыахтарын сөбүн графикка туруортаран барытыгар көмөлөһөбүт”, — диэн тыа хаһаайыстыбатын салайааччыта Лена Бочкарева сырдатта.