Билиҥҥи кэмҥэ кэлэр кэскили түстэһэр, чөл өйдөөх- санаалаах ыччат тарбахха баттанар. Көнө майгылаах, үтүө санаалаах, дьоҥҥо үтүөнү оҥорор ыралаах ыччаттар тустарынан истэн киһи сүргэтэ көтөҕүллэр.
Инньэ диэн туран, биһиги бэйэтин үтүө санаатынан, быстах хомуурга барбыт уолаттар оҕолоругар, кэлэн иһэр Саҥа дьылынан ис сүрэҕиттэн сэмэй бэлэх оҥорон, оҕолорго үөрүүнү бэлэхтээбит Айлан Былчахов туһунан кэпсиэхпитин баҕарабыт.
Айлан улуустааҕы “Кубок Бытантая — 2023” хапсаҕай күрэҕэр киирсэн, Иван Горохов дьиэ кэргэниттэн анал харчынан бириис ылбыта. Кини ол бирииһин тус бэйэтигэр туттубахха, минньигэс бэлэхтэри ылан оҕолору үөрдэргэ туруммут.
Бу туһунан Иван Горохов, Егор Стручков кэргэннэрэ санааларын үллэстэллэр.
Лидия Суханова, Иван Горохов кэргэнэ:
— Айлан бэйэтэ соһуччу дьиэбитигэр кэлэн оҕолорго бэлэҕин биэрэн барбыт этэ, хомойуох иһин биһиги дьиэҕэ суох бириэмэбитигэр түбэспит. Хапсаҕай күрэҕэр биэрбит анал бирииспитинэн быстах хомуурга сылдьыбыт, сылдьар уолаттар оҕолоругар Саҥа дьылынан минньигэс бэлэх оҥордум, диэн хаалларан барбыт.
Түгэнинэн туһанан Айлаҥҥа улахан махталбытын тиэрдэбит. Баҕарабыт кытаанах доруобуйаны,үлэтигэр, олоҕор үрдүктэн-үрдүк ситиһиилэри,үтүө санаата сүүс төгүл эргиллэн тиийдин, диэн баҕа санаабытын тиэрдэбит.
Светлана Потапова, Егор Стручков кэргэнэ:
— Биир үтүө күн дьиэбитигэр олордохпутуна, Айлан Былчахов киирэн кэлэн, оҕолорго минньигэс кэһиитин туттартаан соһутта. Кини быстах хомуурга барбыт уолаттар оҕолоругар бэйэтин санаатыттан бэлэх оҥортообут эбит, биһиги оҕолрбунаан олус диэн үөрдүбүт, соһуччу бэлэхтэн.
Барҕа махталбытын тиэрдэбит Айлаҥҥа,кэлэн иһэр Саҥа дьылынан эҕэрдэлиибит! Баҕарыа этибит туох баар сырдыгы, кэрэни, тус олоҕор үрдүк ситиһиилэри! Бу курдук үтүө санаалаах эдэр ыччаттарбыт элбии туралларыгар баҕарабыт.
Марианна СЛЕПЦОВА