Олунньу 15-16 күннэригэр Дьокуускай куоракка Саха сирин үөрэнээччилэрин «Спортивные якутяне” Спартакиадатын чэрчитинэн дуобакка хамаанданан күрэхтэһии буолла. Хотугу оройуоннарга биһиги улууспут оҕолоро 1 миэстэни ситистилэр!
“Дуобат оонньуутугар Сахабыт сириттэн уопсайа 24 хамаанда, 96 кыттааччы кытынна. Ол иһигэр Арассыыйа, Европа, аан дойду кыайыылаахтара уонна призердара бааллара. Биһиги оҕолорбут хотугу оройуоннарга 1 миэстэни, онтон өрөспүүбүлүкэ 24 улууһуттан 13-с миэстэ буоллубут.
Личнэй зачекка Сардана Слепцова – 16 миэстэ, Ася Попова – 16 м., Сарыал Колесов – 15 м., Прокопий Старостин – 16 м. буоллулар.
Кэнчээри ыччаттарбыт өрөспүүбүлүкэбит киэҥ уораҕайыгар бу маннык үрдүк кирбиилэри дабайыылара улууспут баһылыга Иннокентий Стручков уонна оройуоммут дьокутааттара биир ситимнээх үлэбитинэн ситиһиллэр. Кустуур орто оскуолатыттан 3 дуобаччыты кытыннарбыт оскуола дириэктэригэр Матрена Алексеевнаҕа уонна нэһилиэк баһылыгар Роберт Афанасьевичка туһунан барҕа махтал буолуохтун!” – диэн оҕо спортивнай оскуолатын дириэктэрэ Мария Афанасьева сырдатта.
Сардаана Копырина