Төрөөбүт тыл уонна сурук – бичик күнүн чэрчитинэн, Оҕо саас киинигэр сүрдээх сэргэх күрэс буолан ааста.
Улуустааҕы «Аман өс» күрэскэ 1-9 кылаастартан барыта 9 үөрэнээччи кыттыыны ылла. Икки түһүмэхтээх күрэскэ кыттааччылар боччумнаахтык туттан, сахалыы ыраастык, санааларын тиэрдимтиэтик, сатабыллаахтык этэн күөн көрүстүлэр. Маннык күрэстэр оҕоҕо төрөөбүт тыл кэрэтин өйдөтүү, иҥэрии, киэҥ эйгэҕэ саҥарыы сатабылын сайыннарар сыалтан ыытыллаллар. Оҕолор бары даҕаны, бэрткэ бэлэмнэммиттэр, саҥаран баран кэлээр диэбит дьон буолан биэрдилэр. Ордук чорботон эттэххэ, кустуурдар санааларын сааһылаан, аһаҕастык этэр дьоҕурдаахтара көһүннэ. Дьарҕаалаахтар ордук дорҕоонноохтук ааҕалларын хайҕыы иһиттибит. Саккырыыр орто оскуолатыттан соҕотох кыттааччы Арина Кардашевская, сахалыы ыраастык саҥарара сэҥээртэ. Дьүүллүүр сүбэҕэ Кииннэммит бибилэтиэкэ ситимин салайааччыта Лидия Сыроватская, Р.И.Шадрин аатынан орто оскуолаҕа саха тылын уонна литературатын учуутала Прасковья Слепцова уонна «Бытанай уоттара” эрэдээксийэ кылаабынай эрэдээктэрэ Яна Рожина киирдилэр.
Түмүк маннык буолла:
-7-10 саастаахтарга 1 миэстэни Миа Корнилова(ДОО), 2 миэстэ – Эливана Прокопьева (КОО) уонна 3 миэстэ – Гордей Попов (КОО);
— 11-14 саастаахтарга 1 миэстэни Станислав Попов (КОО), 2 миэстэ – Анита Никитина (ДОО) уонна 3 миэстэ – Арина Кардашевская (СОО);
— 15-18 саастаахтарга 1 миэстэни Владимир Попов (КОО), 2 миэстэ – Аябрина Слепцова (ДОО) уонна 3 миэстэ – Дайаана Стручкова (ДОО).