Бу күннэргэ улуус киинигэр «Арктическай десант” бырайыак сүнньүнэн Саха сирин Епархиятыттан матушка Елизавета уонна священник Тихон кэлэн Түгэһиир нэһилиэгин дьонун-сэргэтин кытары көрсөн, баҕалаахтары сүрэхтээтилэр, мэлиибэн оҥордулар. Саккырыыр орто оскуолатыгар сылдьан оҕолору кытта көрсөн кэпсэттилэр уонна өҥнөөх принтер бэлэх ууннулар.
Тихон: — Мин Нуучча православнай Таҥаратын дьиэтин Саха сиринээҕи епархиятын православнай аҕабыыта буолабын. Эбээн Бытантай улууһугар монахиня Елизаветалыын кэлэ сылдьабыт, биһиги бу дойдуга номнуо хаһыс да кэлиибит буолла.
Елизовета, Саха сирин епархиятын монахинята: — Мин эһиги улуускутугар аҕабыт Тихоны арыаллаан сылдьабын. Биһиги дьону кытта көрсөбүт, мэлииппэ ыытабыт, оҕолору кытта үлэлиибит. Бу улууска тоҕо кэлэбит диир буоллахха, Эбээн Бытантай сиригэр-уотугар православнай аҕабыыттар эрдэ олох үктэнэ илик дойдулара буолар. Саха сирин үрдүнэн бу эрэ улууска Таҥара дьиэтэ, итэҕэлгэ үөрэтии диэн, олох суох. XIX үйэ бүтүүтэ XX үйэ саҕаланыыта часовня тутулла сылдьыбыт, ол эрэн өр турбакка симэлийэн сүтэн биһиги кэммитигэр тиийбэтэх. Саха сирин епархиятын миссионерскай салаатын күүстэринэн Түгэһиир нэһилиэгэр хаһыс да сырыытын Таинство Крещения уонна Божественная Литургия ыытылыннылар. Биһиги сүрүн сыалбыт-сорукпут диэн, дьону итэҕэтэ сатааһын эрэ буолбакка кыһалҕалаахтарга көмөлөһүү буолар, ол сороҕор сатанар, сороҕор сатаммат.
Санатан этэр буолахха, биһиги улууспутугар 2022 сыллаахха сэтинньи ыйга Дьокуускай куораттан «Арктическай десант” бөлөҕө бастакытын көтөн кэлбитэ. Саха сирин епархиятын «Арктическай десана” үгүс хайысхалаах, өрөспүүбүлүкэҕэ аан маҥнайгытын ыытыллар улахан бырайыак буолар. Бу бырайыак сүнньүнэн нэһилэнньэни медицинскэй чинчийии, ону таһынан Нуучча православнай Таҥаратын дьиэтин Саха сиринээҕи епархиятын бэрэстэбиитэллэрэ итэҕэллээх, итэҕэлгэ тардыһар нэһилиэнньэни кытары көрсөн, духуобунай тиэмэлэргэ кэпсэтэллэр. Бырайыак сүнньүнэн билигин да элбэх үлэлэр ыытылла тураллар.