Сергей Сивцев 2023 сыллаахха норуот итэҕэлин ылан Ил Түмэн Судаарыстыбаннай мунньах дьокутаатынан талыллыбыта.
Ааспыт сылга Эбээн Бытантай национальнай улууһун олохтоохторуттан норуот дьокутаатыгар 40 -тан тахса араас көрдөҺүү киирбит. Сергей Афанасьевич чэпчэтиилээх авиабилиэт, ынах сүөҺүгэ комбинированнай субсидия, суол- иис боппуруостарыгар СӨ Ил Түмэн Судаарыстыбаннай мунньаҕар тиҺиктээх үлэни ыытар. Бу күннэргэ дьокутаат Саха Өрөспүүбүлүкэтин ситэриилээх былааһа 2024 сылга ыыппыт үлэтин нэһилиэнньэ иннигэр отчуоттур бөлөҕүн састаабыгар киирэн улууска кэлэ сырытта.
- Кылгастык дьокутаат быһыытынан үлэм туһунан кэпсиир буоллахха, ааспыт 2024 сылга эбээнбытантайдартан суругунан уонна төлөпүөн да нөҥүө, араас социальнай ситимнэринэн да буоллун ортотунан 40-тан тахса көрдөһүү, этии киирбитэ. Ол курдук, оҕолор араас тэрээһиннэргэ айаннара, эмтэниигэ барыы, анал дьайыы кыттыылаахтарыгар көмө уо.д.а. Сүрүннээн үлэлэһэммит, биһиги өттүбүтүттэн кыаллар боппуруостары үксүлэрин быһаардыбыт. Маны тэҥэ, сылын аайы тутуу, ынах сүөһүгэ, үүккэ субсидия курдук боппуруостар бэбиэскэттэн түспэттэр. Билиҥҥи кэмҥэ хоту улуустарга чэпчэтиилээх авиабилиэт ахсаанын элбэтиигэ, кэллиэгэбин Виталий Семенович Чикачевтын чопчулаһар үлэни ыыта сылдьабыт, бүддьүөт ылылларыгар этиилэри киллэрэбит. Ол эрэн быйылгы кээмэй 2024 сыл таһымыгар хаалла. Манна син биир салгыы үлэлэһиэхпит.
Сергей Афанасьевич сүрүн үлэтэ – «Арктика суоллара” хааһына тэрилтэтин генеральнай дириэктэрин собуйааччыта. «Маны тэҥэ, сүрүн үлэм сүнньүнэн Саккырыыр-Кустуур, Саккырыыр – Дьарҕаалаах хайысхалар нэһилиэктэр икки ардыларыгар суоллар боппуруостарыгар үлэлээтибит. Бу суоллар аны күһүҥҥүттэн өрөспүүбүлүкэ көрүүтүгэр бэрилиннэ. Ол эбэтэр, биһиги “Арктика суоллара” тэрилтэбит көрүүтүгэр. СӨ тырааныспарка уонна суолга – иискэ миниистир I солбуйааччыта Анатолий Потапов кэлэн бу быһаарыыны бигэргэттэ. Ол эбэтэр, эбии тиэхиньикэ уонна 3 үлэ миэстэтигэр үбүлээһин көрүллүөҕэ, диэн эттэ. «Кировец», вездеход уонна топливозаправщик ылыахпыт диэн быһаардыбыт. Кэлэр сайын улуус дьаһалтата суоллар пааспардарын үлэтин бүтэрэннэр, өрөспүүбүлүкэтээҕи суоллар реестрдарыгар киириэхтэрэ. Оччотугар аны күһүҥҥүттэн биһиги бу суолларга үлэбитин саҕалыахпыт. Манна эбэн эттэххэ, биһиги быйыл улууска баар учаастакпытыгар болотоходнай тиэхиньикэ аҕалыахтаахпыт. Бу тиэхиньикэлэр суоллары хаачыстыбалаахтык, ыстандаарка эппиэттиир гына оҥорорго улахан күүс буолаллар. Суол – иис уонна да атын араас боппуруостарга улуус, нэһилиэк баһылыктарын кытары ыкса ситимнээхтик үлэлэһиэхпит диэн, бигэ эрэллээхпин. Эбээн Бытантай национальнай улууһа үүнэ-сайда турарыгар баҕарабын, биир сомоҕо буолан, биир үтүө санаанан салайтаран үлэлээтэххэ, хайаан даҕаны үтүө түмүк тахсар!”
Улуус олохтоохторун аатыттан дьокутааппытыгар үлэтигэр ситиҺиилэри, хас биирдии киҺи туҺугар тус кыҺамньыгын, киирэр көрдөҺүүлэри быҺа гыммакка быҺаарарга кыҺалларгын сыаналыыбыт диэн туран, барҕа махтал тылларын этэбит!