Айылҕаттан айдарыылаах, уран тарбахтаах Анна Афанасьевна бүгүн — Саха Өрөспүүбүлүкэтигэр норуот маастарын күнүгэр 70 сааһын туолар үбүлүөйдээх кэрэ – бэлиэ күнэ.
Биһиги Анналыын 1997 сыллаахтан билсэн, күн бүгүҥҥэ диэри дьүөгэлии, дьиэ кэргэнинэн ыаллаһар ситиммитин быспакка сылдьабыт. Анна оччолорго кулуупка норуот тыйаатырыгар костюмерынан үлэлиирэ. Үлэлиир кэмнэригэр «Тугусил» үҥкүү ансамбылын көстүүмнэрин, ырыаһыттар таҥастарын , Саҥа дьыллааҕы маскарадтары, ыһыахха кэтиллэр таҥастары, араас олбохтору, ат ,таба киэргэллэрин тигэрэ. Анна дьүөгэ, ийэ, эбээ быһыытынан олус истиҥ, сытыары сымнаҕас, үтүө сүбэһит. Ону тэҥэ, кэргэнинээн Киэсэлиин тыаҕа сылдьарын балыктыырын, кустуурун, сир астыырын олус сөбүлүүр. Дьиэ ис –тас оҥоһуутун бэйэтэ тутан-хабан оҥорор, киэргэтэр. Куруук дэлэгэй астаах, оҕолорун, сиэннэрин наһаа үчүгэй дьон гына иитэлээн таһаартаата. Олус сэмэй, нарын, ылыннарыылаах тыллаах, киэҥ көҕүстээх, сытыары,сымнаҕас майгылаах, уйан дууһалаах, сырдыкка –кэрэҕэ тардыһыылаах, кимиэхэ да суох хатыламмат атын буочардаах иистэнньэҥ. Маннык кэрэ-нарын Далбар Хотун дьүөгэлээхпинэн киэн туттабыт.
Анна Афанасьевнаны (Аннабытын) өрөгөйдөөх 70 сааскын туолар үбүлүөйгүнэн ис сүрэхпититтэн эҕэрдэлиибит! Дьоллоох буол күндү дьүөгэм!
Ефимовтар дьиэ кэргэттэрэ
Күндү Анна Афанасьевна !
Орто туруу баран дойдуга күн сирин көрөн 70 сааскын томточчу туолбут үбүлүөйгүнэн истиҥ иэйиилээх иһирэх эҕэрдэбитин тиэрдэбит!
Элбэх оҕо күн күбэй ийэтэ, элбэх сиэн,хос сиэн истиҥ-иһирэх эбээтэ буолан толору чөмчүүк таастыы дьоллонон, тапталлаах кэргэниҥ,чугас дьонноруҥ, оҕолоруҥ, сиэннэриҥ,хос сиэннэриҥ үөрүүлэринэн, ситиһиилэринэн кынаттанан көтө -дайа сылдьарыҥ олус кэрэхсэбиллээх.
Киэҥ-холку, чиэһинэй, хайдахтаах да ыараханнартан чаҕыйбат, ыктарыылаах да кэмҥэ ыгылыйбат майгыҥ, кыһамньылаах үлэһит, олох кыһалҕаларын өйдүүр, сымнаҕас майгылаах дьиэ кэргэн истиҥ-иһирэх ийэтэ эбээтэ буоларгын, үрдүктүк сыаналыыбыт, махтанабыт!
Күндү Анна Афанасьевна , аймах-билэ дьонноруҥ, үгүс атастарыҥ-доҕотторуҥ махталларынан арыаллатан, истиҥ сыһыаннарыгар уйдаран өссө да чэгиэн-чэбдик сырыт!
Ыарыы ыалласпатын, дьаҥ-дьаһах халты хаамтын, үтүө ыраҥ туолан санаабыккын ситэн ис- диэн айхаллыыбыт!
Оҕолоруҥ-сиэннэриҥ тапталларыгар уйдаран уһуннук дьоллоохтук, сүһүөҕүҥ үрдүгэр сылдьан үлэлээн-хамсаан үгүс дьоҥҥун-сэргэҕин үөрдэ сырыт!
Эҕэрдэни кытта Эбээн-Бытантай култууратын улэһиттэрэ.