Муус устар 23 к. – Аан дойдутааҕы остуол тенниһин күнэ

Бу күн улуус киинигэр биир дойдулаахпыт, остуол тенниҺин тарҕатааччы, СӨ уонна УҺук Илин призера Варвара Сотрудникова аҺаҕас турнир тэрийэн ыытта.

  • Мин тенниһинэн оҕо эрдэхпиттэн үлүһүйэн дьарыктанабыт. Ол курдук, кэккэ ситиһиилэрдээхпин, Саха сирин, Уһук Илин күрэхтэригэр хас да төгүл миэстэлэһэн турабын. Бэйэм 27 сыл устата баан үлэһитэ этим, 19 сыл Сбербааҥҥа уонна 8 сыл Алмазэргиэнбааҥҥа үлэлээбитим. Өрөспүүбүлүкэ таһымнаах элбэх күрэхтэри тэрийэн ыыппытым, өрөспүүбүлүкэтээҕи теннис Федерациятыгар үлэлээбитим. 2023 сылга Дьокуускай куорат дьаһалтата остуол тенниһин Бочуот бэлиэтин туттарбыттара. Билигин теннис сүгүрүйээччилэрин ватсапп бөлөҕүн иилиибин, манна 200 – тэн тахса киһи баар, санаа уопут атастаһабыт. Теннис таһынан видео,хаартыска түһэрэринэн дьарыктанабын. Бу дьарыкпын туһанан, ютуб каналбар 70 – тан үөһэ саастаах бэтэрээн теннисистэр, оҕолор дьарыктарын, сайыҥҥы теннис саалатын тутуутун туһунан устубутум, сэҥээриини ылбыта. Ол курдук, Саха сирин теннисистэрин, спонсордар өйөбүллэринэн 200 тыһ.солк. хомуйбутум, сайыҥҥы саала тутуутугар. Кэлэр сылга Муоматтан сылдьар тренер Александр Слепцовтыын арктическай улуустар икки ардыларыгар Дьокуускай куоракка теннис күрэҕин тэрийэн баҕалаахпыт. Биһиги улууспут хамаанда туруоруоҕа диэн эрэнэбин. Манна бэлэмнэнэн тренер ыҥыран дьарыктары ыыттараргыт буоллар.  Турнирбыт олус үчүгэйдик буолан ааста. Спортивнай оскуола дириэктэригэр Мария Афанасьеваҕа Дойдубар остуол тенниһин сэргээччилэр баалларыттан наһаа үөрдүм. Саамай саастаах кыттааччыбыт Игорь Евгеньевич Мушников оонньоото. Баҕалаах оҕолор да бааллар эбит, кыргыттар аҕыйахтар.  Теннис киһиэхэ наһаа туһалаах спорт көрүҥэ буолар, координацияны, реакцияны, таба көрүүнү, өйү сайыннарар. Бу көрүҥ аан дойдуга киэҥник тарҕанан турар. Онон, хас биирдии тэрилтэҕэ, оскуолаларга теннис остуолларын туруорар табыгастаах буолуо этэ, спорстменнар уопутурулларын туһугар элбэх күрэхтэри ыытар бэрт буолуо. Биһиги спортивнай оскуолабыт олус хараҥа эбит, манна сырдатыытыгар салалта болҕомтототун ууран өйүүрэ тоҕоостоох. Спорт – чөл олох, чэгиэн турук, ол эбэтэр омук сайдыытын түстүүр, улуус аатын ааттатар. Бу күннэргэ Чебоксар куоракка 16 саастарыгар диэри кыргыттарга, уолаттарга Арассыыйа Первенствота буола турар. Манна Москуба сборнайыттан Чурапчы улууһун Хатылы диэн кыракый бөһүөлэгиттэн Изот Кривошапкин бастакы ракетка, кини көмөтүнэн бу хамаанда 3 бочуоттаах миэстэ буолла. Бу Саха сирин тенниһин историятыгар чаҕылхай көрдөрүү. Оренбург куорат хамаандатыгар Ньургун Наумов баар, кини 14 саастарыгар диэри оонньооччуларга дойду ТОП -24 киирэр. Биһиэхэ эмиэ балайда кыахтаах оҕолор бааллар диэн бэлиэтээтим. Онон, тенниһи өйүөххэ, өрө тутуохха, дьарыктаныҥ, доруобуйаҕытын чэбдигирдиҥ!

Эр дьон:

  • 1 миэстэ – Иван Сивцев;
  • 2 миэстэ – ИванТоскин;
  • 3 миэстэ – Константин Горохов.

Кыргыттар уонна оскуола оҕолорун кыра бөлөҕө:

  • 1 миэстэ – Лаура Попова;
  • 2 миэстэ – Айгуля Горохова;
  • 3 миэстэ – Ганс Стручков.

 

Читайте дальше