“Мир Арктики-2024” Аартыка уран тарбахтаахтарын сомоҕолуур

Дьокуускай куорат килбэйэр киинигэр, А.Е. Кулаковскай аатынан Норуоттар доҕордоһууларын дьиэтигэр кулун тутар 19-24 күннэригэр “Мир Арктики-2024” VI норуоттар икки ардыларынааҕы быыстапка-дьаарбаҥка ыытылынна.

Манна Аартыка норуотун ураты иистэрин, оҥоһуктарын, төрүт дьарыктарын дьон көрүүтүгэр, дьүүллүүр сүбэ сыанабылыгар таһаардылар.

Маннык тэрээһин айар-тутар дьону бииргэ түмэн, уопут атастаһалларыгар, билиилэрин кэҥэтэллэригэр күүстээх көмө буолар.

Быыстапка сыала-соруга Арассыыйа Федерациятын Хотугу, Сибиир уонна Уһук Илин уокурук төрүт олохтоох аҕыйах ахсааннаах норуоттарын төрүт үгэстэрин чөлүгэр түһэрии уонна киэҥ араҥаҕа тарҕатыы буолар.

Эбээн Бытантай улууһун маастардара бу тэрээһинтэн туора туран хаалбатылар, барытыгар көхтөөх кыттыыны ыланнар, бэйэлэрин үлэлэрин көрдөрөн, киэҥ эйгэҕэ таһааран сыралаах үлэлэрэ тустаах сыанабылы ылан миэстэҕэ тигистилэр.

Ол курдук, Кустуур нэһилиэгиттэн Ольга Попова кыттыыны ылан бочуоттаах үһүс миэстэҕэ тиксэн  “Изделия из меха и кожи. Хозяйственно-Бытовая утварь” диэн анал ааты сүгэн 3000 тыһ. солк. сертификатынан наҕараадаланна.

Антонина Слепцова сүрдээх үчүгэй, аныгылыы быһыылаах төрүт норуотун таҥаһын, суумкатыгар тиийэ сабынан баайан II миэстэҕэ таҕыста. Кини “Современный национальный костюм северных народов” Анал аат хаһаайына буолла.

Бу улахан таһымнаах быыстапкаҕа маннык испииссэннэн баайыыны улаханнык сэҥээриэ суохтара да буоллар дии санаатарбын да, кыттар баҕаттан үлэбин илдьибитим. Үөрүөм туһугар, убаастабыллаах дьүүллүүр сүбэ оҥоһукпун сыаналаан Анал аат биэрэн, миэстэҕэ тиксибиппиттэн олус үөрдүм. “Мир Арктики-2024” тэрээһиҥҥэ биир дойдулаахтарым кыттыыны ыланнар, олус киэргэттилэр дии санаатым. Ол курдук, Муома Улахан Чыыстайыттан сылдьар Слепцовтар дьиэ кэргэн династиялара, удьуор табаһыттар, ”- диэн Антонина Слепцова кылгастык санаатын үллэстэр.

 

Марианна Слепцова