Мэдиссиинэ үлэһитин күнэ быйыл бэс ыйын 14 күнүгэр түбэһэр. Эбээн-Бытантай улууһугар эмп үлэһиттэрэ үтүө үгэс быһыытынан идэлээх күннэрин айылҕаҕа тахсан бэлиэтиэхтэрэ. 
Кэлиҥҥи сылларга мэдиссиинэ бары хайысханнан балысханнык сайынна. Оннооҕор кытыы сытар уһук хоту улуустар олохтоохторо аныгы үйэ араас тэрилинэн доруобуйаларын туругун чинчийэн, ыарыыны эрдэттэн сэрэтэр кыахтаннылар. Куһаҕан суоллаах-иистээх нэһилиэктэри быраастар мобильнай биригээдэлэрэ кэрийэн, дьон миэстэтигэр көрдөрүнэрэ олус табыгастааҕын бэлиэтииллэр.
Биһиги улууспутугар 3 мэдиссиинэ тэрилтэтэ баар: улуус киинигэр Саккырыырга киин балыыһа, Кустуурга врачебнай амбулатория, Дьарҕаалаахха фельдшерскай-акушерскай пуун. Бу иһигэр 14 быраас, 32 орто мэдииссинэ, 8 младшай мэдиссиинэ персонала баар. Бырааска 3 ыстаат, орто персоналга 2 ыстаат аһаҕас тураллар.
Доруобуйа харыстабылыгар араас бырагыраамалар үлэлииллэр. Ол курдук, “Земский доктор” бырагырааманан стоматолог Елисей Валерьевич Елисеев, анестезиолог-реаниматолог Николай Иннокентьевич Потапов номнуо 4-с сылларын үлэлииллэр. Терапевт Татьяна Дмитриевна Томская 2016-2021 сс. эмиэ бу бырагырааманан үлэлээн баран, салгыы үлэлии сылдьар. Саҥа оҕо бырааһа Антонина Николаевна Габышева быйыл бырагырааманан үлэлии кэллэ. Дьарҕаалаахха “Земский фельдшер” бырагырааманан эдэр исписэлиис Уйгулана Васильевна Колесова 2023 сылтан үлэлиир.
«Доруобуйа харыстыбалын маҥнайгы сүһүөҕүн саҥардыы» бырагыраама нөҥүө балыыһа тэриллэрин саҥардыы тэрээһиннээхтик барда, саҥа мэдиссиинэ эбийиэктэриттэн Кустуурга врачебнай амбулатория 2022 сыллаахха үлэҕэ киирбитэ.
Талбыт киһи эмчит диэн ааты сүкпэт, бу уустук идэни быһалаабат. Эмчит үлэтигэр үөрүү-хомолто, үрүҥ-хара алтыһыылара күн аайы баар, ону киһи эрэ барыта уйбат. Ол да иһин, эмчит идэтин дьиҥ-чахчы баһылаабыт дьону норуот убаастаан, ытыктаан «Үрүҥ халааттаах аанньал» диэн ааттыыр.
Эмп үлэһиттэрин бүгүҥҥү идэлээх күннэринэн улуустааҕы киин балыыһа кылаабынай бырааһа Анатолий Баишев кэллиэгэлэрин итиитик-истиҥник эҕэрдэлиир: «Бука бары биир идэлээхтэрбин, бүгүн үлэ үѳhүгэр сылдьар кэллиэгэлэрбин уонна оройуон доруобуйатын харыстабылыгар кылааттарын киллэрсибит бары бэтэрээннэри Эмп үлэһиттэрин күнүнэн итиитик-истиҥник эҕэрдэлиибин! Эhигини мэлдьи кытаанах доруобуйа, дьон махтала-таптала арыаллаатын, күүскүтүгэр күүс, эрчимҥитигэр эрчим эптин-кынаттаатын!”
Сардаана Копырина