Кулун тутар 5-6 күннэригэр спорду сэргээччилэр, саха оонньуулары сэҥээрээччилэр Дьокуускай куоракка буолбут СӨ национальнай многоборьеҕа эр дьон уонна дьахталлар икки ардыларыгар чөмпүйэнээти кэтии-мэнии, бэйэ дьонугар “ыалдьа” олорбуттара саарбаҕа суох. Бу чөмпүйэнээт сайын Таатта улууһугар ыытыллар XXII «Манчаары оонньууларыгар” сүүмэрдиир күрэх быһыытынан баран интэриэс өссө сытыырхайда. Күрэхтэһиигэ Эбээн-Бытантай улууһуттан үс киһи кыттыыны ылан, эдэр спортсменнарбыт улууспутугар икки путевканы аҕаллылар! 
Ол курдук, биһиги улууспут чиэһин дьахталларга Илана Никитина, эр дьоҥҥо Айастаан Колесов, Александр Ефимов көмүскээтилэр. Дьахталлар “Үс төгүл үс”, “тутум эргиир”, “мас тардыһыы”, “ох саанан ытыы”, “400 м. ыраахха сүүрүү” түһүмэхтэргэ кыттан, биһиги кыыспыт Илана 21 кыттааччыттан 12-с миэстэ буолла. Айастаан Колесов эр дьоҥҥо 70 киилэҕэ диэри ыйааһыҥҥа киирсэн, “Үс төгүл үс”, “тутум эргиир”, “мас тардыһыы”, “ох саанан ытыы”, “400 м. ыраахха сүүрүү”, “хапсаҕай” түһүмэхтэри ааһан, 22 кыттааччыттан 14-с миэстэ буолла. Бэлиэтээн эттэххэ, күрэхтэһиигэ 24 улуустан спортсменнар күөн көрүстүлэр, уопсайа 67 кыттааччы кытынна, 48 путевка оонньонно. 16 иһигэр киирбит спортсменнар «Манчаары оонньууларыгар” кыттарга путевканы ыллылар.
Бу күрэххэ биһиги биир дойдулаахпыт, Н.Г. Черношевскай аатынан Бүлүүтээҕи профессиональнай-педагогическай колледж физическай, патриотическай иитиигэ дириэктэри солбуйааччы, Баһылай Манчаары аатынан «Модун» өрөспүүбүлүкэтээҕи спорт киинин многоборье көрүҥүн сүрүннүүр исписэлииһэ Дмитрий Саввинов кылаабынай судьуйа быһыытынан аан маҥнайгытын сүрэхтэннэ.
“Үтүө күнүнэн, биир дойдулаахтарым! Национальнай многоборьеҕа личнэй уонна хамаанданан чөмпүйэнээккэ улахан дьоҥҥо кылаабынай судьуйа быһыытынан үлэлээтим. Сайын Таатта улууһугар буолар “Манчаары оонньуутугар” уопсайа 48 путевка оонньонно. Күрэхтэһии бүтэн, түмүк тахсан, путевкалар хаһаайыттарын буллулар. Даҕатан эттэххэ, бу көрүҥҥэ уопсайа 80 путевка оонньонор. Аныгыс нэдиэлэҕэ уолаттар уонна кыргыттар икки ардыларыгар Первенство буолар. Онно эмиэ путевкалар оонньоноллор.
Кылгастык эттэххэ, “Манчаары оонньууларыгар” многоборье көрүҥэр кылаабынай судьуйанан үлэлиэхтээхпин. Ол иһин ыытыллар сүүмэрдээһин күрэхтэһиилэргэ булгуччу судьуйалыыбын. Ол таһынан кулун тутар 19-20 күннэригэр Дьокуускай куоракка табаһыттар сүлүөттэрэ, улахан күрэхтэһии буолаары турар, онон эмиэ кылаабынай судьуйа быһыытынан үлэлиэхтээхпин. Биир дойдулаахтарбар ситиһиилээх, кыайыылаах-хотуулаах кыттыыны баҕарабын.
Бэҕэһээ түмүктэммит чөмпүйэнээккэ биһиги биир дойдулаахтарбыт ситиһиилээхтик кыттыбыттарынан итиитик-истиҥник эҕэрдэлиибин! Бэйэм төрөөбүт дойдум дьоно кэлэн, сүүмэрдээһиҥҥэ кыттыбыттарыттан киһи үөрэр. Тоҕо диэтэххэ, биһиги курдук ыраах тайаан сытар хотугу улуустан кэлэн, киин улуустары кытта конкуренция ааһаммыт путевка ылбыппыт биһиэхэ улахан ситиһии буолар. Аны «Манчаары оонньууларыгар” көрсүөхпүт, Айастаан, Илана ситиһиилээхтик кыттыахтара диэн эрэнэбин.
Түгэнинэн туһанан, улууһум бары кэрэ аҥардарын кэлэн иһэр сааскы маҥнайгы бырааһынньыгынан итиитик-истиҥник эҕэрдэлиибин!» — диэн Дмитрий Олегович санаатын үллэһиннэ.
Сардаана Копырина