Саха сирин 40 нэһилиэгэр Киинэ саалалара дьоһун быһыыга арылыннылар.
Ол иһигэр, алтынньы 4 күнүгэр «Гарпан» этнокултуурунай кииҥҥэ Киинэ салаата үөрүүлээх быҺыыга арыллынна. Дьоһун түгэҥҥэ Саха Өрөспүүбүлүкэтин Ил Дархана Айсен Николаев, дойдубут Бэрэсидьиэнин аппаратыттан Дмитрий Песков, Арассыыйа Бэрэсидьиэнин аппаратын салайааччыта Максим Орешкин, “Экстра – Синема” платформа генеральнай дириэктэрэ Петр Чиряев, “Кыталыктаах кырдалларым” киинэ режиссера Михаил Лукачевский онлайн быһыынан кыттыбыттара, уһук хоту сир олохтоохторугар үрдүкү салалта өттүттэн ураты болҕомто уурулларын туһаайар.
— «Биһиги киинэ саалатын арыйар санааны өр кэмҥэ иитиэхтии сылдьыбыппыт. Бүгүн, ол ыра санаабыт туолан,216 миэстэлээх саалабытын дьэ, арыйдыбыт. Кэлэктиибинэн сүбэлэһэн «Түгэс» диэн сүрэхтээтибит. Култуура министиэристибэтэ ыыппыт куонкурсугар кыттан 498 000 солк. сууммалаах LED экран ылбыппыт. Бу экран барыта 1 мөл.солк. сыаналаах, онон 502 тыһ.солк. Түгэһиир дьаһалтата уйуммута. “Экстра – Синема” тэрилтэни кытта биир ситимҥэ үлэлиэхтээхпит, билиэт атыытыттан киирэр дохуоттан 70% кинилэргэ барар. Бу платформа 600 тыһ.солк. киинэ көрдөрөр проекторы биэрдэ, маныаха «Түгэһиир нэһилиэгэ» олохтоох дьаһалта баһылыга Сергей Аликов, солбуйааччыта Дмитрий Сыроватский өйөөннөр, 290 тыһ.солк. утары үбүлээбиттэрэ. Манна туох баар киинэ көрдөрөргө наадалаах тэриллэр, ол курдук компьютер, роутер, стабилизатор, видеонаблюдение, мобильнай экран, мантаж кэмпилиэгэ барыта киирэллэр. РЦИТ тэрилтэни кытары ыкса үлэлэһэммит сибээспитин түргэтэтттибит, туох баар киинэлэрбитин «Экстра – синема” интернет ситимин нөҥүө ыытар, ону ыларбытыгар 1 киинэ – 2.5 чаас курдук бириэмэни ылар. Инникитин, «Пушкинская карта» уонна да атын киллэриэхпит. Түгэнинэн туһанан, бу киинэ саалата арыллыытыгар улахан өҥөлөрүн, өйөбүллэрин уурбут дьоммутугар Түгэһиир нэһилиэгин салалтатыгар, үлэһиттэрбэр Мария Ивановна Аммосоваҕа, сүүрэн – көтөн 200 киилэттэн тахса тэриллэри ыыппытыгар, Анжелика Семеновна Максимоваҕа, куонкуруска кыттар туох баар докумуоннарбытын болдьоҕор, сөпкө таҥан оҥорбутугар, экраммытын таҥарга көмөлөспүт Семен Васильевич Эверстовка уонна бэйэбит уолбутугар, кэскиллээх үлэһиппитигэр Александр Викторович Ефимовка, таҥыы үлэтин сүрүнүн, туох билиитин-көрүүтүн ууран оҥордо, улахан махталбын этэбин, — диэн «Гарпан” этнокултуурунай киин дириэктэрэ Раиса Старостина үөрүүлээх түгэни үллэһиннэ.
Бу күн көрөөччү болҕомтотун, кутун – сирин туппут «Кыталыктаах кырдалларым» киинэ премьерата көһүннэ, киириитэ буор- босхо. Бу киинэҕэ бэйэбит оҕобут, биир дойдулаахпыт Эрхан Слепцов оонньообута, киинэ көрөөччүлэригэр икки бүк үөрүүлээх, долгутуулаах буолла.
Санатан эттэххэ, 70-90 сылларга үс нэһилиэккэ киинэ көстөрө. Оччолорго, экран нөҥүө араас ис хоһоонноох, араас көлүөнэҕэ анаммыт киинэлэр дьикти, алыптаах курдук буолаллара. Киинэ көрдөрөр мэхээньиктэр Саккырыырга Лев Егорович Старостин, Кустуурга Иван Иванович Постников, Дьарҕаалаахха Борис Михайлович Стручков илии күүһүнэн проекторы эргитэллэрэ, уруһуй биллэриилэри ыйыыллара. Урукку көлүөнэ бу кэмнэри бэрткэ диэн долгуйа өйдүүр, ахтар буолуохтаах. Киинэҕэ сылдьыыттан сүрэхтэр да холбоһоллоро, сэмэй доҕордоһуулар, истиҥ сыһыаннар саҕаланаллара, биир тылынан тыа сирин дьоно – сэргэтэ истиҥ эйгэҕэ түмсэллэрэ. Онон, бүгүн уһук хоту күүтүүлээх киинэ саала арыллыбыта ураты истиҥ, долгутуулаах, кэскиллээх.
Яна Рожина