Тыйыс тымныы кыһыммыт тиийэн кэлэн, үгүс дьон төбө ыарыыта оҥостор кыһалҕалара дьиэ-уот, үлэлиир сирин сылааһа буолар.
Эбээн Бытантай улууһугар быйыл ититэр ситим дьыалата кыстыкка төһө бэлэмин, туох уларыйыылар баалларын, сайыҥҥы бириэмэҕэ ыытыллыбыт үлэлэр хайдах туруктаах туралларын билээри ОДьКХ салайааччытын Максим Петровичтыын кэпсэттибит.
— Дорообо, Максим Петрович бастатан туран, сайыҥҥы бириэмэҕэ туох үлэлэр ыытыллыбыттарын сырдатаргытыгар көрдөһөбүт.
— 2023 сылга былааннаммыт өрөмүөн былаана 100 % оҥоһуллунна. Ол курдук, 1,2,3 №-дээх хочуолунайдарга толору өрөмүөн үлэтэ, ол эбэтэр сылаас ситимэ барар турбалары саҥардыы, уопсайа 660 погоннай миэтирэ усталаах. Эргэ турбалары саҥа ППУ(пенополиуретановой изоляции) турбаларга уларытыы, бу турбалар уратыларын бэйэҕит да сайын уларытар бириэмэлэригэр көрбүккүт буолуо, бэйэтэ таһынан туспа пенополиуретан диэн, анал халыҥ бүрүллүүлээхтэр.
2 №-дээх хочуолунайга оһоҕу, горелканы уларыттыбыт уонна дымовой турба туруордубут. Түгэһииргэ 1,2,3 №-дээх уонна 9 № Кустуур бөһүөлэгэр баар хочуолунайдарга саҥа 37 кВт кыамталаах сетевой носуостары уларыттыбыт.
Маны таһынан, ОДьКХ ититэр ситимигэр эбии, анал байыаннай дьайыыга барбыт уолаттар дьонун дьиэлэрин холбооһун үлэтэ ыытыллыбыта.
— Омукчаан уонна Севернай уулуссалар дьиэлэрэ тымныытын олохтоохтор үгүстүк этэллэр, манна туох хамсааһын оҥордугут?
— 2 №-дээх хочуолунайга киирэр Омукчанская уонна Северная уулуссаҕа сылаас ситимэ ситэри тиийбэтин көннөрөргө куораттан Дьулуур Владленович Степанов кэлэн үлэлээтэ, кини СӨ ОДьКХ тэхиниичэскэй көрдөрүү салаатын сүрүн исписэлииһэ. Кинини кытта тэҥҥэ үлэлэһэн, 1 уонна 2 №-дээх хочуолунайдарга болдьоҕунан сылаас ситимэ барар толоруутугар туһаныллар оһохтору, турбалары көрөн-истэн, бэрийэн үлэҕэ бэлэмнээтибит.
— Суол туруор диэри уматык саппааһа хайдаҕый?
— Билиҥҥи туругунан, 1365 туонна уматыктаахпыт. Саппааспыт ордуга ахсынньы ый 19 чыыһылатыгар диэри тиийэр кыахтаах.
— Быйыл уматык тиэйиитэ хаһан саҕаланарый?
— Сабаҕалаан биллэриллибитинэн, Саккырыыр-Баатаҕай кыһыҥҥы суола ахсынньы 1 күнүгэр арыллара күүтүллэр.
— Максим Петрович, сиһилии кэпсээҥҥит иһин махтанабыт.