Дьааҥы улууһун Боронук нэһилиэгэр РФ уопсай үөрэхтээһинин Туйгуна, СӨ үөрэҕириитин туйгуна, спорт бэтэрээнэ В.В. Ноговицын бирииһигэр оскуола алын кылаас үөрэнээччилэрин икки ардыларыгар көҥүл тустууга аһаҕас Первенство ыытылынна. Бу күрэхтэһиигэ биһиги улууспутуттан Петр Стручков салайааччылаах тустуук уолаттарбыт баран, үгүс ситиһии, кыайыы көтөллөөх кэллилэр.
“Боронук диэн сүрдээх үчүгэй сиргэ баран кэллибит. Күрэхтэһии тэрийиитэ олох үрдүк таһымнаах, кыттааччыта да элбэх – 60-тан тахса оҕо. 6 ыйааһыҥҥа буолла.
Биһиги 7 оҕону илдьэ сырыттыбыт. Кыра саастаахтарга икки оҕо 22 киилэҕэ, биир оҕо 32 киилэҕэ, улахаттарга биир оҕо 25 киилэҕэ, үс оҕо 30 киилэҕэ туһуннулар. 22 киилэ ыйааһыҥҥа 12 оҕоттон Вася Сотрудников 3 миэстэҕэ тахсан үөртэ. 32 киилэҕэ Антон Аммосов 4-с миэстэни эрэллээхтик ылла. Евдоким Дмитриев бастакы курэхтэһиитигэр киһи сирбэт тустуутун көрдөрдө. Бу кыраларбыт биһиги улууспут кэнчээритэ кэскиллээх дэтэр оҕолорбут эбээт!
Итинтэн улахан саастаахтарга 25 киилэ ыйааһыҥҥа Спартак Колесов бастакы күрэхпитигэр сүрэхтэннэ. Кытаанах киирсиигэ уһаарылынна. Тустубут оҕолоро уопуттаахтара көстөр.
Уонна саамай элбэх кыттааччылаах 30 киилэ ыйааһыҥҥа биһиги оскуолаттан үс оҕо кытынна. Дьэ, олох тыҥааһыннаах тустуубутугар, полуфиналга түөрт оҕо тахсыбытыттан икки оҕо биһиэнэ, икки оҕо сайдыылар. Кытаанах киирсии түмүгэр Еремей Рожин бастаан үөртэ! Үһүс миэстэҕэ Аким Слепцов тахсар. Егор Никитин кэскиллээҕин көрдөрдө. Бүтэһиккэ хапсаҕай күрэхтэһиитигэр абсолютнайга 21 оҕо тустубутуттан финалга Егор Никитин тахсан үөртэ. Арыый да кыранан маттыбыт.
Күрэхтэһии түмүктэниитигэр дьэ оҕолорбутугар кими да матарбакка спонсорскай бириис бөҕөтүн туттардылар. Ону көрө олорон дьааҥылар, боронуктар олус да тустууну өрө туталлар эбит, үөрэх салалтатыттан саҕалаан оскуола дириэктэригэр тиийэ тэҥҥэ бэйэбитин кытта сылдьаллара көрөргө олус үчүгэй. Дьааҥылар ити курдук баран истэхтэринэ улахан тустууга инникилээхтэр эбит.
6 ыйааһын чөмпүйүөннэрэ лотерея тарпыттарыгар биһиги уолбутугар Еремей Рожиҥҥа түбэһэн бэйэбит эрэ буолуо дуо, боронуктар ытыс тыаһынан эҕэрдэлээтилэр! Еремей быйыл Дьааҥыга хотторбут оҕотун кыайа-хото тутта, ол уолбутун бу сырыыга миэстэ иһигэр киллэрбэтибит. Аким Слепцов итэҕэтиилээхтик очконан кыайда. Спортивнай оскуолаттан кэлбит оҕолорун Еремей финалга олох суулаан кэбистэ. Еремейбит дьиҥнээх ыйааһына 26,5 киилэ этэ. Тренердэр, суудьуйалар сүүрт диэбиттэрин 30 киилэҕэ да сөптөөх киирсиини көрдөрүөҕэ диэбитим.
Түгэнинэн туһанан, иитиллээччилэрим төрөппүттэригэр, илдьэ сылдьыбыт суоппардарбар Альберт Анатольевич Слепцовка, Ян Артурович Поповка, улууспут баһылыгар Иннокентий Стручковка, солбуйааччытыгар Александра Ивановаҕа улахан махталбын тиэрдэбин. Мэлдьи ити курдук оҕолоргутун өйөөн ыытаргыт олус үчүгэй,» — диэн Петр Петрович үөрэн-көтөн, уолаттарынан киэн туттан туран кэпсээтэ.
Сардаана Копырина