Сайын, доҕоттор, умнуллубат күннэр — бу маны барытын КҮНЧЭЭН түмэр! Тыйыс тымныы дойдубутугар сылын аайы үгэскэ кубулуйан үлэлиир , Кустуур орто оскуолатын „КҮНЧЭЭН” лааҕырын смената үөрүүлээх быһыыга-майгыга аһыллыыта буолла . Быйыл уопсайа 1-кы кылаастан саҕалаан 6-с кылааска дылы 40 оҕо сылдьар. Нэһилиэк олохтоохторун оҕо үөрбүт — көппүт, чаҕаархай куолаһа олуһун диэн үөрдэр .

Лааҕыр туһунан сиһилии билэр баҕаттан бүгүн биһиги лааҕыр салайааччытын Мария Семёновнаны кытта көрсөн сиһилии кэпсэттибит.
— Үтүө күнүнэн Мария Семёновна, лааҕыр туһунан кылгастык билиһиннэриэххит дуо?
— Сайыҥҥы сынньалаҥ лааҕыра сыала- соруга оҕо доруобуйатын бөҕүргэтии, бириэмэни туһалаахтык атаарарын ситиһии, бары эйэлээх биир кэлэктиип буолалларыгар иитии.
— Бу лааҕырга Кустуур орто оскуолатыгар үөрэнэр эрэ оҕолор сылдьаллар дуу , эбэтэр атын нэһилиэк, улуус оҕотун ылаҕыт дуу?
— Быйыл Кустуур оскуолатын иһинэн арыллыбыт лааҕыр „Күнчээн” 40 оҕону хапта. Онон, миэстэ аҕыйах буолан үксүн олохтоох, бэйэбит оскуолабыт оҕолорун хабан киллэрдибит. Ол гынан баран, сайылыы кэлбит атын нэһилиэктэн, куораттан оҕолор биһиги лааҕырбытыгар сылдьыахтарын олус баҕараллар. Миэстэ таҕыстар эрэ ыла сатыахпыт.
— Баһаатайдар тустарынан кылгастык билиһиннэриэххит дуо?
— ХИФУ устудьуоннара Альбина, Надя кэлэн баһаатайдаан үлэлэрин олус сөбүлээн, ылсан саҕалаатылар. Бу кыргыттар Кустуур оскуолатын выпускницалара буолаллар.
— Оҕолор лааҕырга күн устата тугунан дьарыктаналларый?
— Лааҕырбыт анал Күнчээн” бырагыраама былаанынан 21 күн араас тиэмэлээх, тэрээһиннэрдээх, доруобуйаны харыстыыр лекциялардаах буолар. Ону таһынан кылгас сайыммытын толору туһанар баҕаттан сибиэһэй салгыҥҥа сүүрүүлээх-көтүүлээх күрэхтэр, экскурсиялар, оонньуулар тохтоло суох ыытыллаллар.
Күнчээн лааҕыр күннэтэ үүнэ-сайда турдун, кэнчээри ыччаппытыгар умнуллубат түгэни бэлэхтээтин!

Наум НАУМОВ,
Кустуур орто оскуолатын 10 кылааһын үөрэнээччитэ