Эрэдээксийэҕэ Аллараа Бытантай олохтоох дьаһалтатыгар тыа хаһаайыстыбатын исписэлииһэ Анна Слепцова иһитиннэриитэ киирдэ.
- « Хороҕор муостаахпытын Айылҕа көстүүтэ, сокуоннара сарбыйар. Кустуур бөһүөлэгэр аһыы оттон (ядовитый вех) сылын ахсын хороҕор муостаахха улахан хоромньу тахсар. Ол курдук быйыл кураан дьыл буолан аһыы от чугас, ыраах мэччирэҥҥэ дэлэйдик үүнэн, балаҕан ыйын саҥатыттан кэтэх хаһаайыстыбалар, ГУП «Саха ынаҕа » тэрилтэ сүһүөлэрэ оҕуннулар.Аһыы оту хомуйууга субуотунньуктар тэриллибиттэрэ. Сүөһүлээх ыаллар, агрооскуола үөрэнээччилэрэ, учууталлара, араас тэрилтэ үлэһиттэрэ кыттыыны ылан, барыта 40 куулга тиийэ алдьархайдаах от хомулунна. Күһүммүт сылыйан уһаата, бу үчүгэйгэ мэччирэҥҥэ тахсыбакка сүөһүлэрбит барахсаттар хаайыллан, кыһыҥҥылыы аһаабыттара ыраатта. Бу от күүстээх дьайыылаах, биир да устууканы сиэтэҕинэ сүөһү былдьанар, бу күһүн уонча төбөнү сүтэрдибит. Биир ыал үс ынахтааҕыттан үһүөн сиэбиттэриттэн, биирин ветеринардар быыһаатылар. Нэһилиэкпит сүөһүлээх ыалларыгар улахан хоромньу таҕыста. Хороҕор муостаахпытын төһөлөөх харыстаабыппыт, манаабыппыт да иһин, кураан сатыылаан көрдүгэннэр уоланнар, кэлэр саас от көҕөрүөр дылы бу аһыы от кутталы эмиэ үөскэтэ көрсүөҕэ.”
Даҕатан эттэххэ, кыһалҕаны Степан Заровняев, «Саха сүөһүтэ» генофондаҕа ХТ селеционер – зоотехнига Москубаҕа тиийэ бу кыһалҕаны иһитиннэрбиттэрин, бу от ханнык да химикатка кыайтарбатын, илии эрэ күүһүнэн хомулларын кэпсээн биһиэхэ биэрбит интервьютыгар кэпсээн турар.
Яна Рожина